जिलाक गांधी मैदानमे काल्हि एनडीए कार्यकर्ता सम्मेलन आयोजित भेल। एहि अवसर पर कार्यकर्ता सभसँ बूथ स्तर पर संगठनकेँ सुदृढ़ करबाक आग्रह कयल गेल। बिहारमे विधानसभा चुनाव होबयवला अछि आ जीतक दावा पहिनेसँ शुरू भऽ चुकल अछि। काल्हि सुपौलमे एनडीए कार्यकर्ता सम्मेलनके संबोधित करैत ऊर्जा मंत्री बिजेन्द्र यादव कहलनि “एहि बेर बिहारमे 5 पांडव (भाजपा, जदयू, एलजेपी-राम विलास, हम, राष्ट्रीय लोक मोर्चा) एक संग चुनाव लड़त आ जीतत।
बिजेन्द्र यादव महाभारतक उल्लेख करैत कहलनि जे जहिना पांडव भगवान कृष्णक नेतृत्वमे कौरवक विरुद्ध लड़लनि तहिना प्रधानमंत्री नरेन्द्र मोदी एहि चुनावमे कृष्णक भूमिका निभा रहल छथि। ओ मुख्यमंत्री नीतीश कुमारकेँ पाँचटा पांडवक नेता बतौलनि आ कहलनि जे राजगक उद्देश्य बिहारक विकास करब अछि। ओ विपक्षक खिल्ली उड़ाबैत हुनका कौरव कहलनि।
कार्यकर्ता सम्मेलनमे भाग लेनिहार बिहार सरकारक मंत्री नीरज कुमार बबलू राजगक जीत पर विश्वास व्यक्त करैत कहलनि, एहि बेर बिहारमे विपक्ष पूर्ण रूपसँ खत्म भऽ जायत। ओ दावा कयलनि जे एनडीए २२५ सँ बेसी सीट जीतकऽ सरकार बनओत।
सम्मेलनक दौरान स्वर्गीय नेता कामेश्वर चौपालकेँ श्रद्धांजलि देल गेल। एहि अवसर पर मंत्री डॉ. दिलीप जायसवाल हुनका स्मरण करैत कहलनि जे ओ सामाजिक आ राजनीतिक जीवनमे प्रेरणाक स्रोत छलाह। बिजेन्द्र यादव उल्लेख कयलनि जे ओ हमर विधानसभा क्षेत्रक छलाह। हुनकर निधनसँ अपूरणीय क्षति भेल अछि। हुनक आत्माक शान्तिक लेल स्मृतिमे दू मिनटक मौन राखल गेल।
एहि कार्यकर्ता सम्मेलनमे एनडीए गठबंधनक पाँचो दलक प्रदेश अध्यक्ष आ वरिष्ठ नेता उपस्थित छलाह। कार्यक्रममे भाजपाक प्रदेश अध्यक्ष आ मंत्री दिलीप जायसवाल, मंत्री बिजेन्द्र प्रसाद यादव, मंत्री नीरज बबलूक संग अन्य प्रमुख नेता शामिल भेलाह।
गाँधी मैदानमे आयोजित एहि सम्मेलनमे कार्यकर्ता सभसँ बूथ स्तर पर संगठनकेँ मजबूत करबाक अपील कयल गेल।
