दरभंगामे एकटा पैघ नाव दुर्घटना भेल । जिलाक कुशेश्वरस्थान लग कोसी नदीमे अचानक एकटा नाव पलटि गेल। एहि दुर्घटनामे कतेको लोकक डूबबाक समाचार अछि। राहत आ बचाव कार्य चलि रहल छल। नाव डूबबाक सूचना भेटैत स्थानीय गोताखोर घटनास्थल पर पहुँचि गेल छलथि। संगहि, डूबल लोकक खोज सेहो कयल जा रहल अछि। समाचार लिखय काल तक कोनो बचावक सूचना नहिं भेटल छल। बीडीओ अशोक कुमार जिज्ञासु, तिलकेश्वर थाना प्रभारी शैलेश कुमार घटनास्थल पर पहुंचि बचाव कार्य शुरू कयलनि। प्राप्त जानकारीक अनुसार जिलाक कुशेश्वरस्थानक गोलमा डीहसँ गोलमा घाट जाइत काल कोसी नदीक ऊपरी भागमे एकटा नाव पलटि गेल। स्थानीय लोकक दावा अछि जे नाव पर ८ सँ १० गोटे छलाह। संगहि नाव पर दूटा बाइक सेहो राखल गेल छल। एहि घटनाक बादसँ एहि क्षेत्रमे सनसनी पसरि गेल अछि। एखन धरि एकटा स्थानीय गोताखोरक सहायतासँ बाइककेँ बाहर निकालल जा चुकल अछि, मुदा अन्य लोक एखनो लापता अछि। लापता लोकमे गोलमाक निवासी बिन्देश्वरी रायक २३ वर्षीय पुत्र राजा कुमार सेहो अछि। किछु दिन पहिने पटनामे १७ लोकसँ भरल एकटा नाव गंगा नदीमे डूबि गेल छल। एहि घटनामे एके परिवारक १७ गोटे डूबि गेल। जाहिमे एसडीएफक टीम १३ लोककेँ बचा लेलक, जखन कि ४ गोटे लापता भऽ गेलाह। एसडीआरएफक टीम दू दिन धरि लगातार बचाव अभियान चलौने छल। सभ गोटे नालंदासँ शवक दाह संस्कार करबाक लेल आयल छलाह। ई घटना तखनि भेल जखनि दाह संस्कारक बाद नाव गंगाक दोसर दिस स्नान करबाक लेल जा रहल छल। कहल जाइत अछि जे एनएचएआईक पूर्व क्षेत्रीय अधिकारी अवधेश कुमार आ हुनक बेटा सहित पाँच गोटे डूबि गेल छल।
