सीएम साइंस कॉलेजक राष्ट्रीय सेवा योजना इकाई आ एचडीएफसी बैंक केर संयुक्त तत्वावधानमे वृहस्पति दिन, 5 दिसंबरकेँ रक्तदान शिविरक आयोजन कयल जायत। जानकारी दैत प्रधानाचार्य प्रो दिलीप कुमार चौधरी बतेलनि जे महाविद्यालयक कामेश्वर भवनमे ई शिविर पूर्वाह्न साढ़े दस बजेसँ लगाओल जायत। जखन कि रक्तदान केर इच्छुक छात्र-छात्रा ओ शिक्षक केर अतिरिक्त समाजक लोकक पंजीकरण 4 दिसंबरकेँ अपराह्न 4 बजे धरि कयल जायत।
ओ कहलनि जे रक्तदान मानवताक भावनाकेँ जीवंत बनौने रखबाक सशक्त माध्यम अछि। रक्तदान कऽ हम जतय एक दिसि ककरो जान बचबैत छी। ओतहि, दोसर दिसि एहिसँ जबर्दस्त आत्म संतुष्टि भेटैत अछि। प्रधानाचार्य कहलनि जे बहुत लोक रक्तदानकेँ लऽ पसरल भ्रांतिक कारण रक्तदान करबासँ कतराइत छथि। जखनि कि एहिसँ कोनो नोकसान होयबाक बजाय अनेक प्रकारक लाभ होइत अछि। ओ महाविद्यालयक छात्र-छात्रा, शिक्षक आ आम लोकसँ रक्तदान करबा लेल आगू अयबाक आह्वान कयलनि।
ओ बतेलनि जे वरिष्ठ चिकित्सक लोकनिक टीम केर देखरेखमे आयोजित एहि शिविरमे रक्तदान केनिहारकेँ मौका पर प्रमाण पत्र आ ब्लड डोनर कार्ड सेहो प्रदान कयल जायत, जकर उपयोग ओ रक्त केर जरूरतमंद लोक लेल अगिला एक साल धरि कऽ सकैत छथि।
