लैंड फॉर जॉब मामिलामे सीबीआई द्वारा आरोपपत्र दाखिल कयलाक बाद आब भाजपा एहि पर अपन प्रतिक्रिया देलक अछि। भाजपा प्रवक्ता नीरज कुमार कहलनि जे रेलवेमे नौकरीक बदला जमीन लिखल जयबाक ठोस प्रमाण अछि। ओ आरोप लगओलनि जे नोकरीक बदलामे भारी मात्रामे नकदी आ सोना सेहो लेल गेल अछि, जकर जाँच सीबीआइ द्वारा सेहो कयल जेबाक चाही।
नीरज कहलनि, मोदीक गारंटी अछि जे कोनो भ्रष्टाचारी बख्शल नहिं जायत। बहुत जल्दी लालू परिवार जेलक भीतर होएत। ओ इहो कहलनि जे जेडीयूक बाद आब भाजपा सेहो एहि मामिलामे सक्रिय भऽ गेल अछि आ सीबीआईसँ आशा करैत अछि जे ओ निष्पक्ष आ गहन जाँच करत, जाहिसँ सभ दोषीकेँ सजा भेटय। एहि मामिलामे सीबीआई पहिनेहें लैंड फॉर जॉब घोटालामे शामिल लोकक विरुद्ध आरोपपत्र दाखिल कऽ चुकल अछि।
आरोप अछि जे रेलवेमे नौकरीक बदलामे कतेको लोकसँ जमीन लेल गेल छल। आब भाजपा एहि मामिलामे नकदी आ सोनाक जांचक मांग कयलक अछि। भाजपा प्रवक्ता नीरज कुमार कहलनि जे लालू प्रसाद यादव आ हुनक परिवारक खिलाफ नौकरीक बदलामे जमीन, नगदी आ सोना लेबाक लेल सख्त कारवाई कयल जयबाक चाही। ओ जोर देलनि जे मोदी सरकार भ्रष्टाचारक विरुद्ध सख्त कदम उठा रहल अछि आ एहि मामिलामे सेहो कोनो समझौता नहिं होयत।
एम्हर जदयू प्रवक्ता नीरज कुमार सेहो लैंड फॉर जॉब मामिलामे सीबीआई द्वारा तेजस्वी आ तेज प्रताप यादवक खिलाफ आरोपपत्र दाखिल करय लेल कटाक्ष कयलनि अछि। ओ कहलनि जे लैंड फॉर जाॅब, ई कोन तरहक ग्रह चक्करक कुचक्र अछि। जनता देलक चारि सीट आ सीबीआई दाखिल कयलक चार्जशीट। सीबीआई अंतिम आरोपपत्रमे तेज प्रतापक नाम सेहो जोड़ने अछि। प्रधानमंत्री नरेन्द्र मोदी चुनाव अभियानक दौरान कहने छलाह जे चुनावक बाद सभ जेल जायत।
