भाजपाक राष्ट्रीय अध्यक्ष आ केन्द्रीय मंत्री जे पी नड्डा लोकसभाक अध्यक्षक सर्वसम्मतिसँ चयन करबाक बदला उम्मीदवार उतारबाक लेल विपक्षी दलसभक आलोचना करैत कहलनि जे, विपक्षक दोहरा मापदंड अछि।
आपातकालक दिवस पर भाजपाक केन्द्रीय कार्यालयमे आयोजित ‘डार्क डेज ऑफ डेमोक्रेसी’ कार्यक्रमकेँ सम्बोधित करैत जेपी नड्डा पूछलनि जे की लोकसभाक अध्यक्षक चुनाव कहियो सशर्त रहल अछि ? ओ (विपक्ष) कहि रहल छथि जे पहिने उपाध्यक्ष तय करू तखन ओ अध्यक्ष पदक समर्थन करत।
नड्डा आगू कहलनि जे ई ओ कहि रहल छथि जे तेलंगानामे अध्यक्ष आ उपाध्यक्ष दुनू अपने दलक बनओलनि। कर्नाटकमे हुनकालोकनिक अपन अध्यक्ष आ उपाध्यक्ष छथि। पश्चिम बंगालमे टीएमसीक अपन अध्यक्ष आ उपाध्यक्ष सेहो अछि। ई ओ लोक छथि जे दोहरा मानदंडमे रहैत छथि।
एहिसँ पहिने राहुल गाँधीक आरोपकेँ खारिज करैत रक्षामंत्री राजनाथ सिंह संसद भवन परिसरमे मीडियासँ कहलनि जे मल्लिकार्जुन खड़गे एकटा वरिष्ठ नेता छथि आ ओ हुनक सम्मान करैत छथि। काल्हिसँ आइ तक तीन बेर हुनकासँ बातचीत भऽ चुकल अछि।
बतबैत चली जे लोकसभा अध्यक्ष पदक चयनकेँ लऽ कऽ सरकार आ विपक्षी दलक बीच कोनो सहमति नहिं बनि रहल अछि। सत्तारूढ़ एनडीए गठबंधन लोकसभाक वर्तमान अध्यक्ष ओम बिड़लाकेँ फेरसँ अपन उम्मीदवार नामित कयलक अछि। संगहि कांग्रेसक नेतृत्वमे विपक्षी दल के. सुरेश केर लोकसभा अध्यक्ष पदक लेल अपन उम्मीदवारक रूपमे नामित कयलक अछि। दुनू नेताकेँ अध्यक्ष पदक लेल प्रस्ताव कयल गेल अछि।
बुधदिन भोर ११ बजे लोकसभाक बैसार होइत अध्यक्षक चुनाव कयल जायत। ओना, सदनमे संख्या बलक बात करब, तऽ ओम बिड़ला एनडीए गठबंधनक उम्मीदवारक रूपमे आसानीसँ चुनाव जीतैत मानल जाइत छथि। नव सरकारक गठनक बाद लोकसभामे सरकार आ विपक्षक बीच ई पहिल शक्ति प्रदर्शन होबय जा रहल अछि।
