भाजपा लोकसभा अध्यक्षक पद अपने लग बरकरार राखय जा रहल अछि। अर्थात १८म लोकसभामे भाजपेक कोनो सांसद लोकसभाक अध्यक्ष चुनल जायत। भाजपाक एकटा वरिष्ठ नेता मीडिया रिपोर्टकेँ खारिज कयलनि आ कहलनि, कोनो सहयोगी दल दिससँ लोकसभा अध्यक्षक पदक कोनो माँग नहिं कयल गेल अछि। भाजपा जल्दिये पार्टी स्तर पर एहि पर विचार करत, आ पार्टी द्वारा नाम पर निर्णय लेलाक बाद एनडीए सहयोगी दलक संग परामर्श कऽ ओहि नाम पर आम सहमति बनत।
वास्तवमे मोदी सरकारक पहिल कार्यकालमे मध्य प्रदेशक इन्दौरसँ भाजपाक लोकसभा सांसद सुमित्रा महाजन आ राजस्थानक कोटासँ भाजपा सांसद ओम बिड़ला दोसर कार्यकालमे लोकसभा अध्यक्ष चुनल गेलाह। मुदा एहि बेर तेसर कार्यकालमे भाजपा लग २०१४ आ २०१९ जकाँ लोकसभामे बहुमत नहिं अछि, तेँ अटकल लगाओल जा रहल अछि जे टीडीपी लोकसभा अध्यक्षक पदक माँग कऽ रहल अछि। कतेको ठाम जेडीयूकेँ लोकसभाक अध्यक्ष चुनल जयबाक चर्चा छल, मुदा भाजपाक वरिष्ठ नेता एहि खबरकेँ मात्र अटकलबाजी कहैत खारिज कऽ देलनि।
सूत्रक अनुसार, प्रधानमंत्री नरेन्द्र मोदी विदेशसँ घुरलाक बाद लोकसभाक नव अध्यक्षक नामपर चर्चा होयत। भाजपा सबसँ पहिने पार्टी स्तर पर लोकसभाक भावी अध्यक्षक नाम तय करत, जकर बाद सहयोगी दलक सङ्ग नामपर चर्चा कयल जायत। जँ सहयोगी दलक तरफसँ कोनो सुझाव वा मांग आबैत अछि तऽ भाजपा फेरसँ एकटा नव फॉर्मूला पर विचार करत।
भारतीय जनता पार्टी (भाजपा) २४ जूनसँ शुरू भऽ रहल १८म लोकसभाक पहिल सत्रमे पार्टीक अपन सांसदक नामकेँ सहमतिक लेल विपक्षी दलसँ सेहो सम्पर्क करत, जाहिसँ लोकसभाक नव अध्यक्षक चुनाव सदनमे सर्वसम्मतिसँ कयल जा सकय। जँ विपक्षी दल सरकारक प्रस्ताव स्वीकार करैत अछि तखन चुनाव नहिं होयत। मुदा जँ विपक्ष सेहो अपन तरफसँ कोनो उम्मीदवार ठाढ़ करैत अछि तखन नव अध्यक्षक चुनावक लेल २६ जूनकेँ लोकसभामे मतदान भऽ सकैत अछि। दुनू मामिलामे लोकसभाक नव अध्यक्ष २६ जूनकेँ कार्यभार सम्हारताह।
उल्लेखनीय अछि जे केन्द्रीय संसदीय कार्य मंत्री किरेन रिजिजू बुधदिन संसद सत्रक तारीखक घोषणा करैत एक्स पर पोस्ट करैत कहलनि, “१८म लोकसभाक पहिल सत्र २४ जून सँ ३ जुलाई धरि नवनिर्वाचित सदस्यक शपथ/पुष्टि, अध्यक्षक चुनाव, राष्ट्रपतिक अभिभाषण आ एहि पर चर्चाक लेल बजाओल जा रहल अछि। राज्यसभाक २६४म सत्र २७ जूनसँ प्रारम्भ होयत आ ३ जुलाईकेँ समाप्त होयत।”
