भारत आ खाड़ी सहयोग परिषद अर्थात गल्फ काॅरपोरेशन काउंसिल (जीसीसी) केर बीच द्विपक्षीय व्यापार पछिला साल बढ़ि कऽ १६२ अरब डॉलर भऽ गेल अछि। ई जानकारी सरकार द्वारा देल गेल अछि।
विदेश मंत्रालयमे संयुक्त सचिव (खाड़ी) असीम पी. महाजन कहलनि जे आब भारतक कुल व्यापारमे जीसीसीक हिस्सेदारी १५ प्रतिशत अछि। ऊर्जा, रक्षा, सुरक्षा आ स्वास्थ्य सन बढ़ैत क्षेत्रमे एहि देशसभक महत्वपूर्ण योगदान अछि।
राष्ट्रीय राजधानीमे फिक्कीक एकटा कार्यक्रममे ओ कहलनि जे समग्र व्यापारक आंकड़ामे उतार-चढ़ाव भऽ सकैत अछि, मुदा जीसीसी देशसभकेँ भारतक निर्यात लगातार बढ़ि रहल अछि।
भारत जीसीसी देशसभकेँ प्रोसेस खाद्य पदार्थ, गहना, कृत्रिम रेशा आ सूत, कपड़ा, औषधि आ अभियांत्रिकी वस्तु, आ रासायनिक उत्पादक विस्तृत श्रृंखलाक निर्यात करैत अछि।
महाजन कहलनि जे भारत आ खाड़ी देशक बीच सांस्कृतिक आ द्विपक्षीय व्यापार मजबूत अछि। तेलक आयातमे वृद्धिक कारण जीसीसीक सङ्ग भारतक आर्थिक सम्बन्धमे उल्लेखनीय सुधार भेल अछि। २०२२क सरकारी आंकड़ाक अनुसार, भारतक तेल आयातमे जीसीसी देशक हिस्सेदारी ३५ प्रतिशत आ गैस आयातमे ७० प्रतिशत अछि। २०२१-२२ मे भारत जीसीसी देशसभसँ ४८ अरब डॉलरक कच्चा तेलक आयात कयलक। ओतहि २०२१-२२ के दौरान २१ अरब डॉलरक एलएनजी आ एलपीजी आयात कयल गेल छल।
वित्त वर्ष २०१७-१८सँ भारत आ जीसीसी देशसभक व्यापार १०.५७ प्रतिशतक सीएजीआर (चक्रवृद्धि वार्षिक वृद्धि दर) सँ बढ़ि रहल अछि।
एहि साल फरवरीमे प्रधानमंत्री नरेन्द्र मोदी संयुक्त अरब अमीरात (यूएई) आ कतरक दौरा कयलनि। एतय प्रधानमंत्री दुनू देशक शीर्ष नेतृत्वक सङ्ग द्विपक्षीय व्यापारक सम्बन्धमे वार्ता कयलनि अछि। वित्तीय वर्ष २०२२-२३ मे संयुक्त अरब अमीरातक सङ्ग भारतक द्विपक्षीय व्यापार ८५ अरब डॉलर छल। एहि अवधिमे भारत आ कतारक बीच द्विपक्षीय व्यापार २० अरब डॉलर छल।
