बिहारक दोसर एम्स दरभंगाक शोभनमे बनत
आखिरकार केंद्र सरकारक भेटल मंजूरी
दरभंगा | समदिया
पटनाक बाद बिहारक दोसर एम्स दरभंगामे बनत, जकरा लेल शोभनमे जमीन चिन्हित कयल गेल अछि। नीतीश कुमार कहलनि जे एम्स बनलाक बाद एहि शहरक विस्तार आओर होयत।
बिहारक मुख्यमंत्री नीतीश कुमार सोमदिन कहलनि जे दरभंगाक शोभनमे एम्स स्थापित करबाक लेल केंद्रसँ मंजूरी भेटि गेल अछि। केंद्र सरकार दरभंगा एम्सक ऊँचाई बढ़ाबय के कहलक अछि, जे पहिनेसँ तय छल, हम एकरा आओर बढ़ा रहल छी। दरभंगामे संवाददाता सभसँ बातचीत करैत नीतीश कुमार कहलनि जे एहिसँ शहरक बहुत विस्तार सेहो होयत।
पटनाक बाद बिहारक दोसर एम्स दरभंगामे बनत, जकर लेल शोभनमे जमीन चिन्हित कयल गेल अछि। दरभंगा यात्राक क्रममे मुख्यमंत्री २७४२.०४ करोड़ टाकाक लागतसँ दरभंगा मेडिकल कॉलेज आ अस्पतालक पुनर्विकास योजनाक अन्तर्गत प्रति वर्ष २५० नामांकन वला शैक्षणिक भवन आ २,१०० बेडक अस्पताल आ राजकीय महारानी रामेश्वरी भारतीय चिकित्सा विज्ञान संस्थान, मोहनपुरक निर्माणक शिलान्यास कयलनि।
मुख्यमंत्री १९४.०८ करोड़ टाकाक लागतसँ ४०० बेडक सर्जिकल ब्लॉक सहित विभिन्न योजनाक उद्घाटन सेहो कयलनि। ओ कहलनि जे शोभन दरभंगामे एम्स स्थापित करबाक लेल बहुत नीक स्थान अछि, जकर हम पहिचान कयने छी। यातायातक लेल नीक कनेक्टिविटी अछि, जतय लोक आसानी सँ पहुँचि सकैत अछि। शोभनमे एम्सक निर्माणसँ दरभंगा शहरक विस्तार सेहो होयत।
