मुंबई, कांदिवली स्थित सुरभि हॉउसमे, दिनांक 03.05.2025 रविदिन, शुभसीता फॉउंडेशन केर तत्वावधानमे, स्थानीय बिहारी समाजसेवी लोकनिक बैसार संपन्न भेल। जनतब दी जे, आगामी 15 जूनकेँ मीरा स्थित लता मंगेशकर सभागृहमे संस्था एवं स्थानीय समाजसेवी द्वारा एकटा बिहारी सम्मलेनक आयोजन कएल जाएत।
शुभसीता फॉउंडेशनक संस्थापिका मनोरमा झा, अप्पन वक्तव्यमे कहलनि की, प्रवासी लोकनिक मध्य एकजुटता आ आपसी समन्वय स्थापित करबाक उद्देश्यसँ बिहार संवाद कार्यक्रमक आयोजन कएल जा रहल अछि। देशक तमाम शहर महानगरक विकासमे, बिहारी समाजक योगदान रहल अछि, मुदा आब बिहारी समाज अप्पन जन्मभूमिक विकास लेल सेहो, किछु कार्य करए चाहैत अछि। इएह सभ विषय वस्तु पर विचार – विमर्श करबाक लेल एहि तरहक बिहार संवाद कार्यक्रम मुंबई केर विभिन्न क्षेत्रमे कएल जाएत।
एहि अभियानमे बढ़ि चढ़ि क’ कार्य कएनिहार अभियानी रोहन झा, समाजक हर वर्गक लोककेँ एकत्रित करबाक महत्वपूर्ण कार्य करबाक जिम्मा लेने छथि। सुरभि हाउसमे संपन्न भेल बैसारमे बहुत रास अभियानी लोकनिक सहभागिता देखल गेल। उपस्थित हर सदस्य द्वारा सर्वसम्मतिसँ निर्णय लेल गेल कि, मुंबईमे रहि क’ अप्पन मातृभूमिक विकासमे, सहभागिता अवश्य प्रदान कएल जाए। बैसारमे उपस्थित हर सदस्य अप्पन मंतब्य रखलनि।
उपस्थित सदस्यमे, संजय झा, रमन मिश्र, विजय झा, रोहन झा, तिलक चौधरी, धर्मेंद्र झा, प्रमुख छलथि। धन्यवाद ज्ञापित करैत शुभसीता फॉउंडेशनक संस्थापिका मनोरमा झा, हर सदस्यसँ आगामी कार्यक्रमक लेल हर तरहेँ सहयोग करबाक आव्हान कएलनि।
