बिहारक मधेपुरामे एकटा आओर मिनी गन कारखाना उजागर, गाममे बनि रहल मौतक उपकरण

मधेपुरा समदिया
*

मधेपुराक उदाकिशुनगंज थाना क्षेत्रमे मिनी गन फैक्ट्रीक खुलासा भेल अछि । पुलिस आनंदपुरा बरही पंचायतक आनंदपुरा गाममे छापा मारि मिनी गन फैक्ट्रीक पर्दाफाश कs एकटा महिलाकेँ गिरफ्तार कयलक। बंदूक फैक्ट्री चलाबयवाला मनोज यादव मौकासँ भागि गेल। देशमे बनल मस्कट, देशी कट्टा आ हथियार बनेबाक उपकरण सहित आधुनिक अर्धनिर्मित हथियार पैघ मात्रा बरामद कयल गेल अछि।

मिनी गन फैक्ट्री पर पुलिस कारवाई केर संबंधमे एसडीपीओ अविनाश कुमार कहला जे हथियार बनेबाक काज चलि रहल छल। एहि ठाम कारोबार खूब फलैत-फूलैत छल आ तहियासँ एकर खुलासा नहि भs सकल छल। एतय बनल हथियार कतय पहुँचाओल जाइत छल। एखन धरि एकर खुलासा नहि भेल अछि।

एहि संबंधमे पूछला पर एसडीपीओ कहला जे अवैध बंदूक कारखाना चला रहल अपराधी मनोज यादव आ अन्य आरोपीक गिरफ्तारीसँ पूरा मामिला सामने आबि जाएत।

उदाकिशुनगंज थाना क्षेत्रक आनंदपुरा बराही पंचायतक आनंदपुरा गाममे जखनि पुलिस छापा मारलक तs एकटा मिनी गन फैक्ट्रीसँ एकटा देसी मास्केट, एकटा देशी कट्टाक संग भारी मात्रामे आधुनिक अर्धनिर्मित हथियार आ हथियार बनेबाक उपकरण बरामद भेल। मौकासँ दू लाख तैंतीस हजार तीन सय टका नगद सेहो जब्त कयल गेल।
पुलिस पहुंचला पर मिनी गन फैक्ट्री चलाबयवाला मनोज यादव मौकासँ भागि गेल। पुलिस मौकासँ मनोज यादवक पत्नी सुदामा देवीकेँ गिरफ्तार कयलक अछि, चारि गोटेक खिलाफ मामिला दर्ज कयल गेल अछि।

मामिलाक संबंधमे उदाकिशुनगंज अनुमंडल पुलिस पदाधिकारी अविनाश कुमार कहलनि जे, मुख्यालय आ कोसी अंचलक डीआईजी मधेपुरा एसपीक निर्देश पर अपराधी, अवैध धंधा आ व्यवसायक खिलाफ लगातार अभियान चलाओल जा रहल अछि। एहि क्रममे एकटा मिनीगन फैक्ट्री उजागर कयल गेल अछि। ताजा मामिलामे कारवाई चलि रहल अछि। ओ कहलनि जे, फरार लोकक गिरफ्तारीसँ आओर खुलासा होयत।