बिहार राज्य व्यवहार न्यायालय कर्मचारी संघ आइ १६-०१-२०२५ सँ अनिश्चित कालीन कलमबंद हड़ताल पर छथि। एहि संबधमे राज्यक व्यवहार न्यायालय कर्मचारी संघ राज्यपालकेँ चिट्ठी लिखि हड़ताल पर जयबाक घोषणा कयलनि अछि।
चिट्ठीक प्रतिलिपि बिहार राज्य अतंर्गत सभ जिला संघकेँ प्रेषित कयल गेल अछि आ ताहि केर आलोकमे बिहार राज्यक सभटा जिलाक व्यवहार न्यायालयक कर्मचारी संघ अनिश्चितकालीन कलमबंद हड़ताल पर जयबाक निर्णय लेलनि अछि।
एहि परिप्रेक्ष्यमे मैपुप्र केर समदियाकेँ मधुबनी व्यवहार न्यायालयक कर्मचारी संघक प्रमुखसँ ई जानकारी भेटल जे मधुबनी जिलाक व्यवहार न्यायालयक कर्मचारी सेहो आइ १६ जनवरीसँ हड़ताल पर रहताह।
मैपुप्र समदिया जखनि हड़तालक कारण पुछलखिन तऽ कर्मचारी संघ प्रमुख अपन चारि सूत्री मांगक लेल हड़तालक बात कहलनि। चारि सूत्री मांग क्रमशः एहि प्रकारसँ अछि -:
वेतन विसंगति, न्यायिक कैडर, टाईम बांड प्रमोशन आ शत-प्रतिशत अनुकम्पा।
एहि संबधमे मैपुप्र समदिया जखनि एडवोकेट कन्हैयाजीसँ एकर कोर्टक कामकाजमे पड़यवाला प्रभाव आ की कोर्ट बन्द भऽ जाएत पुछल, तऽ एडवोकेट कन्हैयाजी कहलनि जे कोर्ट बन्द नहिं होएत, मात्र कर्मचारीगणक हड़ताल अछि बाकी सभ पुर्ववत् अओताह, हँ तखनि तऽ संबंधित काजक लेल प्रभावित अवश्य होएत, देखबाक अछि जे तकर व्यवस्था कोना की होइत अछि।
