बिहारकेँ विशेष राज्यक दर्जा देबाक माँगकेँ लऽ कऽ एक बेर फेर राजनीति शुरू भऽ गेल अछि। ई माँग नव नहिं अछि। एहि बारेमे पहिनेहों बहुत राजनीति भेल अछि। अगिला साल होबयवला विधानसभा चुनावकेँ देखैत एक बेर फेर राजनीतिक दल एकरा हवा देब शुरू कऽ देलक अछि।
२००५ मे एनडीए सरकारक गठनक बाद मुख्यमंत्री नीतीश कुमार २००६ मे विशेष राज्यक दर्जाक माँग जोरसँ उठौने छलाह, मुदा केन्द्र सरकार एहि माँगकेँ हरदम नजरअंदाज करैत आयल अछि।
४ नवम्बर २०१२ केँ नीतीश कुमार पटनाक ऐतिहासिक गांधी मैदानसँ विशेष राज्यक दर्जाक लेल पहिल बेर सबसँ पैघ हूंकार भरने छलथि। एकर बाद १७ मार्च २०१३ केँ बिहारकेँ विशेष दर्जा देबाक लेल दिल्लीक रामलीला मैदानमे ‘अधिकार रैली’ आयोजित कयल गेल। ओहि समय नीतीश कुमार कहने छलाह जे बिहारकेँ ओकर हक भेटबाक चाही। बिहारकेँ सेहो विकास करबाक अधिकार अछि। बिहार पहिल बेर अपन अधिकारक मांग कयलक अछि आ एकरा देल जेबाक चाही।
नीतीश कुमारक पार्टी जनता दल यूनाइटेड (जेडीयू) दिल्लीमे राष्ट्रीय कार्यकारिणीक बैसारमे बिहारकेँ विशेष दर्जा देबाक माँग कयलक अछि। एकर बाद रवि दिन राजगमे शामिल भेल लोजपा (राम विलास) प्रमुख आ केंद्रीय मंत्री चिराग पासवान सेहो जेडीयू केर धुनमे शामिल भऽ गेलाह। ओ कहलनि, “ई दबावक राजनीति नहिं अछि मुदा हमर मांग रहल अछि जे बिहारकेँ विशेष दर्जा देल जाय। बिहारक कोन पार्टी ई माँग नहिं करत, वा एहि माँग पर सहमत नहि होयत ? हम स्वयं एकर पक्षमे छी।
चिराग कहलनि, “हम एनडीए सरकारमे छी, भाजपा गठबंधनमे सबसँ पैघ दल अछि आ प्रधानमंत्री नरेन्द्र मोदी हमर नेता छथि जिनका पर हमरा सभकेँ विश्वास अछि। ओना, ओ कहलनि जे नव प्रावधानक अन्तर्गत तकनीकी कठिनाई अछि।
राजनीतिक टिप्पणीकार आ वरिष्ठ पत्रकार मणिकांत ठाकुर कहैत छथि जे आब ई मुद्दा जीर्ण भऽ गेल अछि। बिहारक लोक इहो बुझैत छथि जे राजनीतिक दल एकर उपयोग दबाव बनेबाक लेल आ अपन असफलताकेँ नुकाबय लेल कऽ रहल अछि। नीतीश कुमार इहो जनैत छथि जे आब कोनो राज्यकेँ विशेष दर्जा नहिं भेटि सकैत अछि।
ओ कहलनि जे यूपीए सरकारमे ई स्पष्ट भऽ गेल छल जे कोनो राज्यकेँ विशेष दर्जा नहिं भेटि सकैत अछि। एनडीए सरकार सेहो एही लाइन पर चलि रहल अछि। ओना ओ इहो कहलनि जे केंद्र सरकार बिहारकेँ विशेष पैकेज वा कोनो आन सुविधा दऽ सकैत अछि, मुदा ओकर बाद कतेको आन पिछड़ल राज्य सेहो एकर मांग करत।
