सेनाक मनोबल बढ़ेबाक लेल केंद्र सरकार तिरंगा यात्रा निकालबाक निर्णय लेलक अछि। दरअसल ‘ऑपरेशन सिंदूर’क बाद पाकिस्तान द्वारा हमलाक क्रम जारी छल। ओना सेना सेहो पाकिस्तानकेँ मुंहतोड़ जवाब देलक। एहेनमे सेनाक हौसला अफजाईक लेल केंद्र सरकार 11 मईसँ तिरंगा यात्रा निकालय जा रहल अछि।
जनतब जे काल्हि साँझ 5 बजेसँ सीजफायर लागू भेल। बीजेपी प्रदेश अध्यक्ष दिलीप जायसवाल जानकारी देलाह जे बिहार सेहो पाछू नहि अछि। पैघ शहरसँ लऽ कऽ प्रखंड मुख्यालयमे तिरंगा यात्रा निकालल जायत। ओ कहला जे बिहारवासी भारतीय सेनाक संग अछि। बीजेपी अध्यक्ष कहलनि, “हमर सेना पहलगाम हमलाक बदला लेल पाकिस्तान आ पीओकेक 9 आतंकी ठिकाना ध्वस्त कएलक। कार्यवाहीक दौरान भारत ध्यान रखलक जे आम नागरिककेँ नुकसान नहि होय।”
ओ कहलनि जे ऑपरेशन सिंदूरक बाद बौखलाहटमे लगातार तीन दिन धरि भारतीय नागरिक केर निशाना बनायल गेल। सीमा पारसँ ड्रोन आ मिसाइलसँ हमला कएल जा रहल अछि। भारतीय सेना सेहो पाकिस्तानक हमला केर मुंहतोड़ जवाब दय रहल अछि। ओ कहलनि जे काल्हि पाकिस्तान दिससँ दिल्लीकेँ निशाना बनाबैकेँ प्रयास भेल। सेना पाकिस्तान केर सभ मिसाइल आ ड्रोन नष्ट कए देलक।
शहरसभसँ लऽ कऽ प्रखंड मुख्यालयमे तिरंगा यात्रा निकलत। नागरिक सभक फर्ज अछि जे तैयार रहथि। सेनाक कंधासँ कंधा मिलाकऽ संग दिय। हमर सेना पाकिस्तानकेँ मुंहतोड़ जवाब देबामे सक्षम अछि। ओ कहलनि जे पाकिस्तानक इरादा भारतकेँ तबाह करबाक अछि। नागरिकसभके चाही जे आगूक हालातकेँ सामना करबाक लेल तैयार रहथि। बीजेपी अध्यक्ष कहलनि जे केंद्र सरकार सभ राज्य सभ केर रेड अलर्ट जारी कएने अछि। बिहार केर सीमावर्ती जिलामे चौकसी बढ़ा देल गेल अछि।
