बिहार सरकार रक्षाबंधनक दिन 9 आओर 10 अगस्तकेँ महिला आओर बालिका छात्राक लेल सभ बसमे मुफ्त यात्राक सुविधा देलक अछि। परिवारसँ भेंट करबाक आर्थिक बोझ कम आ पावनिकेँ विशेष बनेबाक लेल इ पहल अछि। आओर कतेको राज्यमे सेहो मुफ्त बस यात्राक घोषणा कएल गेल अछि।
ई सुविधा 9 अगस्तक भोर 6 बजेसँ अर्थात शनि दिनसँ 10 अगस्तक देर राति धरि यानी रवि दिन लागू रहत। एहि पहलक तहत हर उम्रक महिला चाहे ओ लड़की छात्रा होथि, कामकाजी महिला होथि वा अन्य, निगमक बसमे बिना टिकटक यात्रा कय सकैत छथि। ई सुविधा निगम केर सब तरहक बस यानी गुलाबी बस, साधारण बस आ डीलक्स बस पर लागू होयत।
पटना, गया, मुजफ्फरपुर, दरभंगा आ पूर्णिया जेहेन 6 क्षेत्रीय कार्यालयसँ गुलाबी, साधारण आ डीलक्स बस विभिन्न रूट पर चलैत अछि। बिहार सरकार केर ई कदम रक्षाबंधन पर्वकेँ आओर खास बनाबै केर दिशामे सराहनीय प्रयास अछि। एहि सुविधासँ महिला आ बालिका छात्रा बिना कोनो आर्थिक बोझकेँ अपन भाई आ परिवारक सदस्यसँ भेंट करबा लेल आसानीसँ यात्रा कय सकैत छथि। बिहार राज्य पथ परिवहन निगम सब यात्रीसँ आग्रह कयलक अछि जे एहि सुविधाक लाभ उठाउ आ उत्सवकेँ हर्षसँ मनाउ। बिहार सरकारक एहि घोषणाक कारण राज्यभरिमे महिलामे खुशी अछि।
रक्षाबंधनक अवसर पर भारतक बहुत राज्य महिलाक लेल मुफ्त बस यात्राक घोषणा कयलक अछि, जाहिसँ ओ अपन भाई आ परिवारसँ भेंट करय लेल आसानीसँ यात्रा कय सकथि। उत्तर प्रदेशमे मुख्यमंत्री योगी आदित्यनाथ 8 अगस्तक भोर 6 बजेसँ 10 अगस्तक आधा राति धरि यूपीएसआरटीसी आ सिटी बसमे महिलाकेँ मुफ्त यात्राक सुविधा देलनि अछि, जाहिमे अतिरिक्त बसक तैनाती कयल जाएत। हरियाणामे 15 साल धरिक महिला आओर बच्चा राज्यक भीतर आओर दिल्ली-चंडीगढ़ मार्ग पर 8 अगस्तक दुपहर 12 बजेसँ 9 अगस्तक आधा राति धरि मुफ्त यात्रा कय सकैत छथि। राजस्थानमे पहिल बेर 9 आओर 10 अगस्तकेँ राज्य परिवहन निगमक बसमे महिलाकेँ मुफ्त यात्राक सुविधा भेटत।
चंडीगढ़, मोहाली आ पंचकुला (त्रिसिटी) मे 9 अगस्तकेँ स्थानीय एसी आ गैर एसी बसमे मुफ्त यात्राक सुविधा होएत, मुदा इ नमहर रूट बस पर लागू नहि होएत। परंपरागत रूपसँ उत्तराखंडमे महिला आ बच्चा सब 9 अगस्तकेँ सरकारी बसमे मुफ्त यात्रा कय सकैत छथि। कर्नाटक, पंजाब आ दिल्लीमे पहिनेसँ साल भरि मुफ्त बस यात्राक सुविधा अछि, जे रक्षाबंधन पर सेहो लागू रहत। मध्य प्रदेशमे 28 लाखसँ बेसी महिलाकेँ लाडली बहन योजनाक तहत 1500 आ 250 रूपयाक रक्षाबंधन बोनसक संग-संग 9 अगस्तकेँ भोपाल आ इंदौरमे मुफ्त बस यात्रा भेटत आ गैस सिलेंडर लेल 43.90 करोड़ रूपया बांटल जाएत।
