बिहारक कैमूरमे ढाई करोड़क हेरोइनक संग यूपीक दूटा तस्कर गिरफ्तार

भभुआ समदिया
*

बिहारक कैमूर जिलाक नुआंव थाना क्षेत्रमे 2.513 किलोग्राम हेरोइनक संग दूटा युवककेँ गिरफ्तार कएल गेल अछि। गिरफ्तार युवक उत्तर प्रदेशक निवासी बताएल जा रहल अछि। पुलिस केर अनुसार, नुआंव पुलिस वाहन जांच कय रहल छल। एहि दौरान मोटरसाइकिल पर सवार दू लोक ओतहिसँ भागि रहल छल। जखनि पुलिस पीछा करय लागल, तँ जैतपुरा पंप कैनाल नहरक किछु दूरी पर दुनू खासि पड़ल। पुलिस दुनूकेँ पकड़ि कऽ थानामे आनलक।

एहि क्रममे जखनि सख्तीसँ पूछताछ कएल गेल, तँ तस्करीक बात स्वीकार कयलक। आरोपीक मोटरसाइकिलक डिक्कीसँ 2.513 किलोग्राम हेरोइन बरामद भेल। जब्त हेरोइनक किमत अंतरराष्ट्रीय बजारमे करीब ढाई करोड़ रुपैया आंकल जा रहल अछि।

मोहनियाक पुलिस उपाधीक्षक प्रदीप कुमार कहलनि जे पुलिस दुनू युवककेँ गिरफ्तार कय लेलक अछि। दुनू गिरफ्तार तस्कर उत्तर प्रदेशक गाजीपुर जिल्लाक दिलदारनगर थाना क्षेत्रक कुशी गामक रहनिहार रूपेश कुमार उर्फ रितेश कुमार आ प्रमोद कुमार कहल जा रहल अछि। दुनू रिश्तामे भाई अछि। पूछताछक दौरान पुलिसकेँ पता चलल जे एहिसँ पहिने सेहो दुनू कतेको बेर हेरोइन तस्करीक काज क’ चुकल अछि। पुलिस उपाधीक्षक कहलनि जे पूछताछक क्रममे गिरफ्तार युवक सभ स्वीकार क’ लेलक जे हेरोइनक ई खेप दिलदारनगरसँ भोजपुर डिलिवरी देबय लेल जा रहल छल, तखने नुआंव पुलिस जैतपुरा पंप कैनाल नहर लग पकड़ि लेलक। गिरफ्तार युवक सभ पुलिसकेँ कहलक जे हेरोइनक खेप पहुँचाबयक एवजमे 5,000 टका भेटैत अछि। पुलिस आगूक कानूनी कार्यवाही कय रहल अछि। आरोपीसँ ढाई किलो हेरोइन, बाइक आ मोबाइल बरामद भेल अछि। पुलिस आब ओ रैकेटक पता लगाबय केर प्रयास कय रहल अछि, जे आरोपीसँ हेरोइन सप्लाई करवा रहल छल।