बीपीएससी प्रीलिम्स परीक्षा रद्द करबाक माँग करैत सर्वोच्च न्यायालयमे याचिका दायर कयल गेल अछि। याचिकामे कहल गेल अछि जे बीपीएससी प्रारंभिक परीक्षामे व्यापक धांधली भेल अछि।
बिहार लोक सेवा आयोग (बीपीएससी) द्वारा प्रारंभिक परीक्षा रद्द करबाक माँग करबाक मामिला सर्वोच्च न्यायालय धरि पहुँचि गेल अछि। याचिकामे कहल गेल अछि जे बीपीएससी प्रारंभिक परीक्षामे व्यापक धांधली भेल अछि। याचिकामे राज्य सरकारसँ बीपीएससी प्रारंभिक परीक्षा रद्द करबाक मांग कयल गेल अछि। एकर अलावा याचिकामे प्रदर्शनकारी छात्र पर पुलिस द्वारा लाठीचार्जक लेल जिम्मेदार जिलाक एसपी आ डीएम केर खिलाफ कारवाईक मांग कयल गेल अछि।
एम्हर बिहार लोक सेवा आयोग (बीपीएससी) केर प्रारंभिक परीक्षा शनिदिन पटनाक 22 केंद्र पर कड़ा सुरक्षाक बीच आयोजित भेल। बीपीएससीक १३ दिसम्बरकेँ आयोजित ७०म संयुक्त (प्रारंभिक) प्रतियोगी परीक्षा अराजकताक बाद पटनाक बापू परीक्षा केन्द्रमे रद्द कऽ देल गेल छल।
एकर बाद फेर पटनाक २२टा केंद्र पर एहि केंद्रक अभ्यर्थीक लेल प्रारंभिक परीक्षा आयोजित कयल गेल। पुनः आयोजित परीक्षा कड़ा सुरक्षा व्यवस्थाक बीच दुपहरिया १२:०० बजे शुरू भेल आ २:०० बजे समाप्त भेल।
जनतब जे १३ दिसम्बरकेँ बिहारक ९१२ केंद्र पर बीपीएससी प्रीलिम्स परीक्षा आयोजित भेल छल, मुदा पेपर बांटबामे देरीक आरोपक कारण पटनाक एहि परीक्षा केंद्र पर हंगामा भेल छल। परीक्षा केन्द्रमे उपस्थित निरीक्षक राम इकबाल सिंहकेँ हृदयाघात भेलनि। एहि दौरान खूब हंगामा भेल आ पटनाक डीएम द्वारा एकटा छात्रकेँ थप्पड़ मारलाक बाद हंगामा आओर बढ़ि गेल। राम इकबालकेँ फेर हृदयाघात भेल आ हुनकर मृत्यु भऽ गेलनि। किछु दिनक बाद प्रश्न पत्र वितरणमे देरीक सबूत भेटलाक बाद बीपीएससी पटनाक एहि केन्द्रक फेरसँ जाँचक आदेश देलक। ई बात सेहो सोझाँ आयल अछि जे ३० अन्य परीक्षा केन्द्रपर सेहो प्रश्नपत्रक वितरणमे देरी भेल छल। तहियासँ छात्र सभ लगातार विरोध कऽ रहल छथि आ बीपीएससी प्रारंभिक परीक्षा रद्द करबाक माँग कऽ रहल छथि।
