लोस चुनावकेँ लऽकऽ परस्पर आरोप-प्रत्यारोप जारी अछि। सम्राट चौधरी आ मंगल पांडेय तेजस्वी यादवक मोदीक प्रति ‘डिप्रेशन’ वाला बयान पर कसगर प्रतिक्रिया देलनि अछि।
बिहारक उपमुख्यमंत्री सम्राट चौधरी आ मंत्री मंगल पाण्डेय रवि दिन विपक्षक नेता तेजस्वी यादव पर जोरदार हमला कयलनि। तेजस्वी पीएम मोदी पर ताना मारने छलाह जे प्रधानमंत्री नरेंद्र मोदी डिप्रेशनमे छथि। एहि पर भाजपा प्रदेश अध्यक्ष कहलनि जे देशमे मजाक नहिं भऽ रहल अछि। हुनक पिता १५ साल बिहारमे मजाक कयलनि। देशमे लोकतंत्र अछि आ ई देश कोनो परिवारक गुलाम नहिं अछि। ओतहि मंगल पाण्डेय कहलनि जे तेजस्वी यादव स्वयं डिप्रेशनमे छथि, हुनक बयानसँ पता चलैत अछि जे ओ हताश आ निराश छथि।
सम्राट चौधरी कहलनि कि लालू प्रसाद जी १५ साल तक की कयलनि ? बिहारक लोक जनैत छथि। प्रधानमंत्री नरेंद्र मोदी ८० करोड़ लोककेँ भोजन देलनि अछि। जँ ज्ञान नहिं अछि तऽ पहिने तेजस्वी यादवकेँ ज्ञान प्राप्त करबाक चाही। ५० करोड़ लोककेँ आयुष्मान कार्डसँ जोड़बाक काज भेल अछि। बाजय लेल, सपना देखबाक लेल सभ स्वतंत्र अछि। दुनू चरणमे जाहि सीट पर चुनाव भेल, पहिने ओतय जमानत बचा लैथि।
राहुल गांधीक बयान पर हमला करैत मंगल पांडेय कहलनि कि राहुल गांधी जी एहि देशकेँ एखनि कहाँ समझलनि अछि। ओ समझलनि अछि इटलीकेँ, ब्रिटेनकेँ, दुनियाक ओहि देशकेँ जे भारतकेँ मात्र नुकसान पहुँचेलक अछि। संगहि तेजस्वी यादव पर निशाना साधैत ओ कहलनि जे जनताक जे उपेक्षा ओ देखि रहल छथि, हुनका दिखाई पड़ि रहल अछि जे २०१९ होय, २०१४ होय, २००९ होय, हर बेर हुनक पिताजी सेहो चुनावसँ पहिने एहने वादा करैत छलाह, जेना तेजस्वी यादव करैत छथि। जाहि दिन परिणाम अबैत अछि ओहि दिन ओ सभ दरवाजा बंद कऽ घरमे चलि जाइत छथि। ४ जूनकेँ तेजस्वी यादवक सङ्ग किनको भेंट नहिं होयत किएक तँ हुनकर स्कोर शून्य होबय जा रहल अछि।
