बिहार भाजपाक प्रवक्ता तमसा कय छोड़लनि पार्टी, पीएमसीएच कांड पर बिफरलाह

पटना समदिया
*

कांग्रेससँ भाजपामे शामिल भेल बिहार भाजपाक प्रवक्ता असित नाथ तिवारी पार्टीसँ इस्तीफा देलनि। हुनकर कहब छल जे ओ पीएमसीएचमे डॉक्टर सभक लापरवाहीसँ बच्चीक मौत भेलाक बाद लापरवाहीक खिलाफ कार्यवाही नहि करबाक कारण ई फैसला लेलनि।

अपन इस्तीफामे असित नाथ तिवारी लिखलनि –
आदरणीय दिलीप जायसवालजी, हालक दिनमे बढ़ल अपराधक घटनाक्रम आ ओकरा बाद पीएमसीएचमे ऊपरसँ नीचा धरि धारदार हथियारसँ फाड़ल गेल बलात्कृत बच्चीक मामिलामे अपनकेँ रुख हैरान करय वला देखायल। अपराधक घटनाक्रमक पीड़ित अपने जकाँ वीआईपी लोक तँ होइत नहि अछि, आम आदमी केर पीड़ासँ अपनेकेँ की लेना-देना। हम जखनि पुलिसकर्मी केर कार्यशैली पर सवाल उठा देलियै, अपने बौखला गेलौं।
पीएमसीएच परिसरमे एंबुलेंसमे रेप पीड़िता ओ बच्ची तड़पैत रहल जकरा बलात्कारी धारदार हथियारसँ कतेको ठाम फाड़ि देने छल, ओकरा बेड नहि भेटल। एकर खिलाफ हम आवाज़ उठा देलियै तँ अहाँके तामस आबि गेल। बलात्कारी पर अहाँके ग़ुस्सा नहि आयल, लापरवाह आ भ्रष्ट अस्पताल प्रशासन पर अहाँके ग़ुस्सा नहि आयल। अछि ना कमाल केर बात ! हम डॉक्टर संजय जायसवाल नहि छी जे एक घुड़कीमे पोस्ट डिलीट कय भागि जायब। हम निजी स्वार्थकेँ मानवीय गरिमासँ ऊपर नहि राखि सकैत छी। अहाँ संग हमरा चलनाई आब संभव नहि अछि। अहाँ पार्टीमे प्रवक्ताक रूपमे हमरा अवसर देलौं ताहि लेल धन्यवाद आ एहि धन्यवादक संग हमर इस्तीफा स्वीकार करु, नमस्कार।