भागवत प्रचार सेवा प्रतिष्ठानक तत्वावधानमे तेरहम वार्षिक कार्यक्रम स्वरूप श्री श्री १००८ सहस्र चंडी यज्ञ व श्रीमद् देवी भागवत महापुराण कथा दिनांक १५ दिसंबर २०२४ केँ प्रारम्भ भेल जे, काल्हि दिनांक २५ दिसंबर २०२४ धरि विरार पूर्वमे आयोजित कएल गेल। एहि महायज्ञमे सहभागिताक लेल मुख्य यजमान (अध्यक्ष) धनंजय झा द्वारा मुंबई आ आसपासक क्षेत्रमे आमंत्रण पत्र पठाओल गेल आ लगभग हर क्षेत्रक लोक एहि महायज्ञमे अप्पन सहभागिता प्रस्तुत करैत देखल गेलाह।
एहि धार्मिक अनुष्ठानक श्रीगणेश, विगत १५ दिसंबरकेँ भव्य कलश यात्रा संगहि पीठ स्थापनाक संग-संग गणेश पूजनक विधिवत प्रक्रियाक उपरांत प्रारम्भ भेल। एहि सभक अतिरिक्त, नित् प्रातःकाल ८ बजेसँ पूजा प्रारंभक संग – संग १० बजेसँ दुर्गासप्तशती मूल पाठ सेहो संपन्न होइत रहल। तदुपरांत हवन कर्म, आ आरतीक उपरांत व्यासपीठ पूजनक पश्चात् संध्याकाल ६ बजेसँ रात्रि १० बजे धरि, परमपूज्य गोभक्त भागवताचार्य श्री राजीवकृष्ण जी महाराजक मुखारविंदसँ देवी भागवत महापुराण कथाक आयोजन सेहो होइत रहल। अंतिम दिन अर्थात २५ दिसंबरकेँ श्री सत्यनारायण पूजा कथा व देवी भागवत पूर्णाहुति हवनक संग – संग महाभंडाराक आयोजन सेहो संपन्न भेल।
प्रतिष्ठानक अध्यक्ष धनंजय झा द्वारा जानकारी देल गेल कि, प्रतिष्ठान द्वारा एहि तरहक आध्यात्मिक/धार्मिक अनुष्ठान, पूर्वमे सेहो होइत रहल अछि आ लोक कल्याणार्थ एहि तहक आयोजन प्रतिष्ठान द्वारा आगूओ होइत रहत। एहि धार्मिक अनुष्ठानक स्वागताध्यक्ष हितेंद्र ठाकुर (पूर्व विधायक / अध्यक्ष बहुजन विकास आघाडी) एवं मुख्य मार्गदर्शक डॉ संदीप झा (चेयरमैन संदीप यूनिवर्सिटी) छलथि त’ संरक्षक प्रवीण हितेंद्र ठाकुर छलथि। एहि धार्मिक आयोजनसँ आसपासक क्षेत्रमे हर्षक वातावरण व्याप्त छल, जे भक्त आ श्रद्धालु लोकनिक उपस्थितिसँ साफ़ प्रतीत होइत रहल। भगवत प्रचार सेवा प्रतिष्ठान आगूओ एहि तरहक धार्मिक अनुष्ठान लेल कृत संकल्पित अछि।
