मुख्य पाहुनक रुपमे बिहार सरकारक पथ निर्माण मंत्री नितिन नवीन सिन्हा अपन संबोधनमे मिथिलाक संस्कृति, संस्कार एवं विभूतिकेँ स्मरण करैत छात्र-छात्राकेँ उत्साहित एवं डाॅ संदीप झा’क एहि आयोजन हेतु सराहना कयलनि।
*
मुंबई समदिया
*
विगत् दिनांक २० जुलाई, २०२५ यथा रविदिन मैथिल समन्वय समिति द्वारा नवम् “धीरज प्रतिभा सम्मान – २०२५” अत्यन्त उत्साह, उमंग तथा हर्षोल्लासक संग ठाणे स्थित एनकेटी काॅलेज सभागारमे आयोजित कयल गेल।
आयोजनमे विपुल संख्यामे दशवीं व बारहवींक छात्र/छात्रा अपन अभिभावक केर संग उपस्थित भऽ सम्मानित कयल गेलथि। विपुल संख्यामे मातृशक्ति, वरिष्ठ व वरेण्य समाजसेवी, विभिन्न संगठनक सम्मानित पदाधिकारीगण उपस्थित भऽ आयोजनकेँ सफल बनेबामे योगदान देलनि। समितिक पदाधिकारीगण लाल-उज्जर परिधानमे सुसज्जित भऽ अतिथि-अभ्यागतके स्वागत करैत उत्साहित रहलाह।
समितिक संरक्षक डाॅ. संदीप झाक मार्गदर्शन एवम् संरक्षत्वमे पुन: समिति सफल आयोजन कय समाजक आशीर्वाद प्राप्त कयलक।
डाॅ संदीप झा कहलनि जे ‘समितिक समस्त पदाधिकारीगण एवम् पेट्रोन सदस्यगण सफल आयोजन हेतु अभिनंदनक पात्र छथि।’ ओ एहि अवसर पर सभागारमे उपस्थित छात्र/छात्रा तथा अन्य वरिष्ठ-सम्मानित दर्शकवृन्दक मध्य प्रेरणादायक, समयोचित उद्बोधन करैत मार्गदर्शन कयलनि।
विशेष कय छात्र/छात्राकें सम्बोधित करैत संरक्षक डाॅ. संदीप झा कहलनि, ” जीवनमे लक्ष्य प्राप्तिक समय जँ विपरीत परिस्थितिक प्रादुर्भाव भऽ जाए, तऽ ताहिसँ किंचित मात्र निराश हेबाक आवश्यकता नहि। महान लक्ष्य प्राप्तिमे बाधा अवश्य अबैत अछि मुदा ताहिकेँ अपन परिश्रमक माध्यमें दूर कयल जा सकैत अछि।”
बिहार सरकारमे पथ निर्माण मंत्री नितिन नवीन सिन्हा मुख्य पाहुन केर रूपमे उपस्थित भऽ समिति परिवारकेँ अनुगृहीत कयलनि। अपन सम्बोधनमे समितिक संरक्षक समेत पदाधिकारीगण तथा उपस्थित दर्शकवृन्दक प्रति आभार व्यक्त कयलनि। मिथिलाक संस्कृति, संस्कार तथा विभूतिकेँ स्मरण करैत छात्र-छात्राक सम्मानार्थ आयोजनकें अवलोकित कय प्रसन्नता व्यक्त करैत डाॅ. संदीप झाक एहि आयोजन हेतु सराहना कयलनि।
छात्र-छात्राकेँ सम्बोधित करैत मंत्री नितिन नवीन सिन्हा कहलनि जे, “जीवनमे सफलता प्राप्त करैत अपन मुलभूत संस्कारकें सदैव आत्मसात करैत रही। परिवार, समाज तथा राष्ट्रक प्रति सदैव कर्तव्यक निर्वहन करैत रही।’
समितिक संरक्षक द्वारा मंत्री महोदयकेँ मिथिलाक पारम्परिक परिधान यथा पाग, अंग-वस्त्रम तथा पुष्प-गुच्छ द्वारा सम्मानित कयल गेल।
दशवीं/बारहवीं कक्षाक छात्र एवम् छात्राकें उपस्थित समाजसेवी, विभिन्न संगठनक प्रतिनिधिगण एवम् समितिक पदाधिकारीगण द्वारा सम्मान-पत्र, मोमेंटो द्वारा सम्मानित कयल गेल। आयोजनक प्रायोजक एवम् नव पेट्रोन सदस्यगणकें मोमेंटो द्वारा सम्मानित कयल गेल।
एवम् प्रकारेण समितिक संस्थापक संयोजक धीरज बाबूक मधुर स्मृतिमे नवम् धीरज प्रतिभा सम्मान समारोह अत्यन्त विलक्षणतापूर्वक आयोजित कयल गेल। मनोरंजन झा एवम् यमुना शर्मा भव्य सांस्कृतिक कार्यक्रमक माध्यमें उपस्थित दर्शकवृन्दकें आह्लादित कयलनि। समारोहक भव्य संचालन धनंजय झा एवम् पंकज झा द्वारा कयल गेल।
समितिक अध्यक्ष राजकुमार झा सफल आयोजनक लेल धन्यवाद दैत कहलनि, “पुन: सफल आयोजनमे प्रत्यक्ष सहयोग देनिहार प्रवासी मैथिल समाजक प्रति समिति विनम्रतापूर्वक आभार व्यक्त करैत भविष्यमे सहयोग, सुझाव एवम् मार्गदर्शनक कामना करैत अछि।”
