बेनीपट्टी प्रखंड अंतर्गत लोरिका गाममे विगत दस दिनसँ चलि रहल अखंड नाम नवाह संकीर्तन, भक्तिपूर्ण वातावरणमे संपन्न भेल। समस्त ग्रामवासीक सहयोग एवं श्री हनुमान सेवा समिति लोरिका (रजि) केर तत्वावधानमे संपन्न भेल एहि नाम संकीर्तन महायज्ञमे आसपासक अनेको गामक कीर्तन मंडली अप्पन-अप्पन सहभागिता सुनिश्चित कएलनि।
संस्थाक संस्थापक/अध्यक्ष धर्मेंद्र कुमार झा जानकारी दैत कहलनि कि, विगत दस वर्षसँ छठिक पारण दिनसँ नाम संकीर्तन शुरू कएल जाइत अछि जे नवाह समापनक पश्चात् एकाह संगहि भव्य शोभायात्रा आ भव्य भजन एवं लोक सांस्कृतिक कार्यक्रमक संग समाप्त होइत अछि।
संस्थाक मुख्य संरक्षक गोपाल चौधरीक कहब अछि कि, लोरिका हनुमान मंदिरक प्रांगणमे आयोजित एहि नवाह संकीर्तनक माध्यमे, गाम समाजमे भक्तिमय वातावरणक निर्माण त’ होइते अछि, संगहि ई कार्यक्रम आपसी सामाजिक समरसता बढएबाक माध्यम सेहो सिद्ध भ’ रहल अछि।
श्री हनुमान सेवा समितिक तमाम कार्यसमिति सदस्य, जाहिमे उपाध्यक्ष – अजय कुमार झा, सचिव – नारायण मिश्र, कोषाध्यक्ष – प्रवीण कुमार झा, सह सचिव इंद्रकुमार चौधरी, उप सचिव – विशालानंद मिश्र, उप कोषाध्यक्ष – निर्मल झा, संगहि समितिक तमाम सदस्य जाहिमे अभिषेक मिश्र, अमित मिश्र, राजीव कुमार झा, भोलू मिश्र, बबलू झा, मुरारी झा, मुकेश झा, आदि एहि कार्यक्रमक सफलताक लेल प्रयासरत छलथि।
अंतिम दिनक भजन एवं लोक सांस्कृतिक कार्यक्रममे अप्पन प्रस्तुति देनिहार कलाकारमे गोपाल झा (व्यास), आशुतोष, विकास झा (वीजे), रामबाबू झा, डॉली सिंह, प्रमुख छलथि। मंच सञ्चालन अक्षय आनंद सन्नीक द्वारा संपन्न भेल। समस्त ग्रामीण समाजक सहयोगसँ संपन्न भेल एहि नाम संकीर्तन महायज्ञसँ गाम समाजमे भक्तिमय वातावरणक निर्माण भेल। ई कार्यक्रम एहिना हर वर्ष निरंतर होइत रहए, समस्त ग्रामवासीक सेहो इएह इच्छा छैन्ह।
