बिहारमे विधानसभा चुनावक लेल कांग्रेस सक्रिय भऽ गेल अछि। कांग्रेस राज्यमे नीतीश कुमारक अति पिछड़ा वोटबैंकमे सेंधमारीक लेल अभियान शुरू कएलक अछि। बिहारमे आगामी विधानसभा चुनावक लेल राजनीतिक तैयारी शुरू भऽ गेल अछि। भाजपा, जदयू, कांग्रेस आ राजद समेत विभिन्न राजनीतिक दल अपन-अपन चुनावी तैयारी लाँच कऽ देने अछि।
कांग्रेस नेतृत्वक निर्देशनक बाद बिहारमे पार्टीक नेता लगातार सक्रिय भऽ चुकल छथि। राज्यमे कांग्रेस बेरोजगारी, पलायन समेत कतेको मुद्दा पर सीएम नीतीशक नेतृत्व वला एनडीए सरकारकेँ घेरि रहल अछि। तहिना, आब कांग्रेस सीएम नीतीश कुमारक अति पिछड़ा वोटबैंकमे सेंध लगबै केर प्रयास शुरू कऽ देलक अछि। कांग्रेस पार्टी बिहारमे ‘जाति नहि, जमात’ अभियान शुरू कएलक अछि।
कांग्रेस पार्टीक ओबीसी विभाग बिहारमे जाति नहि, जमात अभियान आगामी चुनावक दृष्टिसँ शुरू कएलक अछि। कांग्रेसक एहि अभियानक उद्देश्य बिहारक अति पिछड़ा समुदायकेँ अपना दिसि खींचनाइ अछि। कांग्रेसक दिसिसँ अति पिछड़ा समुदायकेँ इहो भरोसा दियाबै केर कोशिश कएल जा रहल अछि जे चुनावमे टिकट बाँटबामे हुनका आबादीक अनुपातक अनुसार हिस्सा भेटत।
कांग्रेसक ओबीसी विभागक अध्यक्ष अनिल जयहिंद एहि अभियानक बारेमें जानकारी देलनि। ओ कहलनि जे एहि अभियानक मुख्य उद्देश्य अति पिछड़ा जातिसभमे जागरूकता पैदा करब आ हुनका ई बतायब अछि जे ओ जाति नहि, बल्कि जमात (वर्ग) क रूपमे अपन वोटक इस्तेमाल करथि। अनिल जयहिंद इहो कहलनि जे ओ एहि बातकेँ सुनिश्चित करताह जे कांग्रेसक टिकट बाँटबामे अति पिछड़ा लोकनिकेँ आबादीक हिसाबसँ टिकट भेटत।
बिहारमे किछु समय पहिने जातिगत सर्वेक्षण कएल गेल छल। एहि सर्वेक अनुसार, बिहारमे अत्यन्त पिछड़ाक जनसंख्या करीब 36 प्रतिशत अछि। अत्यन्त पिछड़ाकेँ बिहारक मुख्यमंत्री नीतीश कुमारक पार्टी जेडीयूक मजबूत वोट बैंक मानल जाएत अछि। अनिल जयहिंद कहलनि कि नीतीश कुमारक पार्टी बिखरि रहल अछि। हुनका अनुसार, कांग्रेसक कोशिश अछि जे अत्यन्त पिछड़ाकेँ अपना संग आनल जाए ताकि ओ भाजपा संग नहि जाय।
