दरभंगाक दिल्ली मोड़ पर स्थित बस स्टैंड पर शनिदिन दिनदेखारे वर्चस्वक लड़ाई केर कारण फायरिंगकेँ घटना घटल, तीन बाइक पर सवार करीब आधा दर्जन अपराधी बस स्टैंड केर समिप बुचामन मोड़ लग चारिसँ पांच राउंड फायरिंग कयलक आ मौका परसँ भागि गेल।
घटनाक प्रत्यक्षदर्शी केर अनुसार फायरिंगक दौरान ओतय मौजूद दोकानदार भयकेँ माहौलमे अपन दोकान बंद कs देलक। सूचना भेटला पर सदर थाना केर पुलिस मौका पर पहुंचल आ जांच शुरू कs देलक। पुलिस मौकासँ एकटा खोखा बरामद कयलक अछि। प्रारंभिक जांचमे पता चलल अछि जे ई पूरा घटना बस स्टैंड केर बंदोबस्तीकेँ लs कs वर्चस्वक लड़ाई केर नतीजा अछि।
घटना केर संबंधमे ड्यूटी पर तैनात मजिस्ट्रेट रामबाबू साह केर कहब छनि जे एहि तनावक बारेमे जिला प्रशासनकेँ पहिनेसँ जानकारी देल गेल अछि, एहि बात केर ध्यानमे राखि बस स्टैंड पर पुलिस बलक संग एकटा मजिस्ट्रेट सेहो तैनात कएल गेल। एकर बादो अपराधी प्रशासनिक व्यवस्थाकेँ धज्जी उड़ाबैत फायरिंगक घटना केर अंजाम देलक।
पुलिसक अनुसार बस स्टैंडक बंदोबस्ती तीन दिन पहिने एक करोड़ 70 लाख रुपयामे एकटा नव ठेकेदारकेँ सौंपल गेल छल, जाहि केर कारण पुरान ठेकेदारमे आक्रोश छल। आशंका अछि जे एहि विवादक कारणे ई घटना भेल अछि।सदर थानाध्यक्ष पूर्व जानकारीक आधार पर पुलिस गश्ती चलि रहल बतौलनि। एम्हर मौका देखि अपराधी गोली चला देलक। पुलिस लगमे लगाओल गेल सीसीटीवी कैमरा केर जांच शुरू कs देलक अछि आओर दावा कएल जा रहल अछि जे जल्दिये अपराधीकेँ गिरफ्तार कएल जायत। ध्यान देबय वाला बात ई अछि कजे एहि गोलीबारीमे कियो घायल नहि भेल अछि, मुदा दिनदेखार घटित ई घटना सुरक्षा व्यवस्था पर सवाल उठौलक अछि। पुलिस आ प्रशासन एहि मामिलाकेँ गंभीरतासँ जांच कs रहल अछि।
