भारतक तीनटा सिरप केर डब्ल्यूएचओ बतौलक खतरनाक, बच्चाक मृत्युक बाद हड़कंप
नई दिल्ली !!
विश्व स्वास्थ्य संगठन (डब्ल्यूएचओ) भारतमे बनल तीनटा मिलावटी दवाईक पहिचान कयलक अछि, जाहिमे सबसँ बेसी चर्चामे रहल कोल्ड्रिफ कफ सिरप शामिल अछि। ई सिरप भारतक तमिलनाडु राज्यमे स्थित श्रीसन फार्मास्यूटिकल्स नामक कंपनी द्वारा बनाओल गेल छल। किछु हफ्ता पहिने मध्य प्रदेशमे अनेक बच्चाक मृत्युक बाद ई मामिला उजागर भेल, जाहिसँ पूरा देशमे चिंता बढ़ि गेल।
डब्ल्यूएचओक जांचमे पता चलल जे कोल्ड्रिफ सिरपमे एकटा जहरीला रसायन डायथिलीन ग्लाइकोल (डीईजी) बहुत अधिक मात्रामे भेटल अछि। बता देल जाउ जे डीईजी एकटा एहेन केमिकल अछि जे शरीरक लेल बहुत हानिकारक होइत अछि। ई किडनी आ लिवरकेँ खराब ढ़ंगसँ प्रभावित कऽ सकैत अछि आ बच्चाक लेल ई जानलेवा सिद्ध भऽ सकैत अछि।
कोल्ड्रिफ सिरपमे एहि रसायनक मात्रा 48 प्रतिशतसँ बेसी भेटल, जखनिकि सुरक्षित मात्रा मात्र 0.1 प्रतिशत हेबाक चाही।
कोल्ड्रिफक अलावा दुटा आरो सिरप सेहो डब्ल्यूएचओ केर चेतावनीमे शामिल अछि। पहिल रेडनेक्स फार्मास्यूटिकल्सक रेस्पिफ्रेश टीआर आ दोसर शेप फार्माक रीलाइफ।
डब्ल्यूएचओ सभ देशसँ अपील कएलक अछि जे जँ ई सिरप कोनो देशमे भेटैत अछि तँ ताहि केर तुरंत डब्ल्यूएचओकेँ जनाबथि, जाहिसँ समय पर कार्रवाई कएल जा सकए।
कोल्ड्रिफ सिरप केर ल’ क’ जखनि जाँच भेल तऽ श्रीसन फार्मास्यूटिकल्सकेँ दवाई बनेबाक अनुमति सरकार झटपट रद्द क’ देलक। संगहि कंपनीक मालिक जी. रंगनाथनकेँ गिरफ्तार क’ लेल गेल। तकरा बाद तमिलनाडु राज्यमे सभ दवाई कंपनी सभक फैक्ट्री सभक गंभीर जाँच शुरू क’ देल गेल अछि, जाहिसँ देखल जा सकय जे कतहुँ आर कियो गुणवत्तामे कोनो लापरवाही त’ नहि क’ रहल अछि।
मध्य प्रदेशमे बच्चा सभक मृत्युक बाद सक्रिय भेल केंद्र सरकार सभ राज्य आ केंद्र शासित प्रदेशकेँ एकटा एडवाइजरी जारी क’ देलक। एहि सलाहमे कहल गेल अछि जे दु वर्षसँ कम उम्रक बच्चाकेँ कफ सिरप बिल्कुल नहि देल जाए। एकर अतिरिक्त, पाँच वर्षसँ कम उम्रक बच्चाकेँ सेहो एहेन सिरप मात्र जरूरत पड़ला पर देल जाए। सरकार डॉक्टर सभ आ फार्मेसी सभकेँ चेतावनी देलक अछि जे बच्चा सभक लेल दवाईकेँ बहुत सावधानीसँ लिखथि आ बेचथि।
स्वास्थ्य विशेषज्ञक कहब अछि जे ई घटना देशक दवाऐ कंपनी सभक निगरानी प्रणालीमे पैघ कमजोरी केर उजागर करैत अछि। हुनक मानब अछि जे आब समय आबि गेल अछि कि भारतमे दवाई बनेबाक प्रक्रिया पर सख्त नियंत्रण राखल जाए आ प्रत्येक बैचक कड़ा जाँच कयल जाए।
आर अनेक समाचार पढ़य लेल एहि लिंकसँ पढ़ि सकैत छी ई-पेपर आ डाउनलोड सेहो कऽ सकैत छी बिल्कुल निःशुल्क : mppdainik.com/e-paper
दीपावली, छठि आदिक शुभकामना देबय लेल एहि नंबर पर संदेश भेजी : 7480018873
