‘भारत जोड़ो न्याय यात्रा’ पहुँचल नागालैण्ड 

राहुल गाँधी देखल गेलाह लोकसँ हाथ मिलाबैत

*

कोहिमा

*

कांग्रेस सांसद राहुल गांधी आइ-काल्हि भारत जोड़ो न्याय यात्राक संचालन कऽ रहल छथि। ई यात्रा मणिपुरसँ प्रारम्भ भेल अछि आ महाराष्ट्रमे समाप्त होयत। मणिपुरसँ प्रारम्भ भेल यात्रा नागालैण्ड पहुँचल। नागालैंडक राजधानी कोहिमामे भारत जोड़ो न्याय यात्राक आगमन पर राहुल गाँधीक स्थानीय लोकसभ गर्मजोशीसँ स्वागत कयलनि अछि। एकर वीडियो सेहो सामने आबि गेल अछि। राहुल गाँधी कोहिमामे स्थानीय लोकसँ भेंट कयलनि। भारत जोड़ो न्याय यात्राक ई तेसर दिन अछि।

वीडियोमे देखल जा रहल अछि जे नागालैंडक लोक राहुल गाँधीक बहुत उत्साहसँ स्वागत कऽ रहल छथि। राहुल गाँधी सेहो जनतासँ हाथ मिलाबैत देखल गेलाह। ओतहि कतेको लोक राहुल गाँधीक संग सेल्फी लैत देखल गेल, जखन कि कतेको लोक सड़क किनारे ठाढ़ भऽ राहुल गाँधीक नामक नारा लगबैत सुनल गेल। एहि दौरान लोकसभ बसक दुआरि पर ठाढ़ राहुल गाँधीसँ हाथ मिलाबय लेल बसक कातमे दौड़ैत देखल गेल। पदयात्राक दौरान राहुल गांधी हाथ जोड़ि सबके अभिवादन केलखिन। स्थानीय लोकसभ सेहो राहुल गाँधीक स्वागत फूल मालासँ कयलकनि।

कोहिमामे कांग्रेस सांसद राहुल गाँधी कहलनि, “पछिला साल देशक अलग-अलग संस्कृति, अलग-अलग धर्म, अलग-अलग भाषाकेँ एक सङ्ग आनबाक लेल हम कन्याकुमारीसँ कश्मीर धरि (भारत जोड़ो) यात्रा निकालने छलहुँ। तकर बाद हमर विचार छल जे हमरा पूरबसँ पश्चिम तकक यात्रा करबाक चाही। हम सब पूर्वसँ पश्चिम तक भारत जोड़ो न्याय यात्रा शुरू केलहुं। ओ आगू कहलनि जे मणिपुरसँ भारत जोड़ो न्याय यात्रा शुरू करैत हम प्रसन्न छी।

ई यात्रा ११० जिलासँ गुजरत।

कांग्रेस अध्यक्ष मल्लिकार्जुन खड़गे यात्राकेँ झंडी देखा कऽ रवाना कयलनि। लोकसभा चुनावसँ ठीक पहिने निकालल जायवला ई यात्रा राजनीतिक रूपसँ सेहो महत्वपूर्ण मानल जाइत अछि। मुदा, राहुल गाँधी आ कांग्रेस पार्टीक कहब छनि जे ई यात्रा राजनीतिक नहिं अछि। कांग्रेसक भारत जोड़ो न्याय यात्रा ६७ दिनमे १५ राज्य आ ११० जिलाक यात्रा करत।

भारत जोड़ो न्याय यात्रा लगभग ६,७०० किलोमीटरक दूरी तय करत। ई यात्रा बेसीतर बससँ पूरा होयत। किछु ठाम पदयात्रा सेहो होयत।

भारत जोड़ो न्याय यात्रा मणिपुरसँ प्रारम्भ होयत आ नागालैंड, अरुणाचल प्रदेश, असम, मेघालय, पश्चिम बंगाल, बिहार, झारखंड, ओडिशा, छत्तीसगढ़, उत्तर प्रदेश, मध्य प्रदेश, राजस्थान, गुजरात आ महाराष्ट्र होइत गुजरत। एतय इहो बता दियौ जे कांग्रेस सांसद राहुल गांधी ७ सितम्बर २०२२ सँ ३० जनवरी २०२३ धरि कन्याकुमारीसँ कश्मीर धरि ‘भारत जोड़ो यात्रा’ निकाललनि। हुनकर १३६ दिनक पदयात्रा ४२ राज्य आ दूटा केंद्र शासित प्रदेशक ७५ जिला आ ७६ लोकसभा निर्वाचन क्षेत्रकेँ कवर करैत ४,०८१ किलोमीटरक दूरी तय कयलक।