भारतीय रेलवेक शाखा आईआरसीटीसी पटनासँ ‘देखो अपना देश’क अन्तर्गत ‘भारत गौरव’ ट्रेन शुरू करय जा रहल अछि। भारत गौरव ट्रेन योजनाक अन्तर्गत भारतीय रेलवे सेहो रेल पर्यटनकेँ बढ़ावा देबाक लेल लगभग ३३ प्रतिशत रियायत दऽ रहल अछि। ई पर्यटक ट्रेन आबयवला ९ जुलाईकेँ बेतियासँ खुजत। भारत गौरव ट्रेन सुगौली, रक्सौल, सीतामढ़ी, दरभंगा, समस्तीपुर, मुजफ्फरपुर, हाजीपुर स्टेशन, पाटलिपुत्र, आरा, बक्सर आ पंडित दीनदयाल उपाध्याय स्टेशन पर रुकत। भारत गौरव ट्रेन देशक कतेको ज्योतिर्लिंग तीर्थ स्थल उज्जैन (श्री महाकालेश्वर ज्योतिर्लिंग आ श्री ओंकारेश्वर ज्योतिर्लिंग), द्वारका (श्री नागेश्वर ज्योतिर्लिंग आ श्री द्वारकाधीश मंदिर), सोमनाथ (श्री सोमनाथ ज्योतिर्लिंग), शिरडी (साई बाबा दर्शन) आ नासिक (श्री त्र्यम्बकेश्वर ज्योतिर्लिंगक अतिरिक्त शनि शिंगनापुर मन्दिर) केर भ्रमण कऽ १९ जुलाईकेँ वापिस आओत। रेलवे सहरसासँ यात्री बुकिंग लेल हेल्पलाइन नंबर 8595937732 जारी कयलक अछि। ई जानकारी दैत आईआरसीटीसी पर्यटन विभागक मुख्य पर्यवेक्षक संजीव कुमार कहलनि जे भारत गौरव ट्रेनसँ तीर्थस्थल पर जयबाक लेल टिकट बुकिंग शुरू कऽ देल गेल अछि। भारतीय रेलवे द्वारा संचालित भारत गौरव ट्रेनमे पहिल बेर दूटा कक्षा राखल गेल अछि। यात्रा १० राति आ ११ दिनक होयत। जाहि मे 20899/- प्रति व्यक्ति स्लीपर क्लाससँ यात्राक शुल्क तय अछि। एसी-III मे यात्रा करय बला तीर्थयात्रीक लेल प्रति व्यक्ति शुल्क 35,795/- रुपैया होयत। श्रेणीक अनुसार वातानुकूलित आ गैर-वातानुकूलित होटलमे रात्रि ठहरबाक व्यवस्था कयल जायत। शाकाहारी भोजन (भोर, दुपहर आ रात्रिभोज), भोर आ साँझक चाहक सङ्ग-सङ्ग प्रतिदिन दू बोतल पानि सेहो देल जायत। यात्राक लेल श्रेणीक अनुसार वातानुकूलित आ बिना-वातानुकूलित बसक व्यवस्था होयत। कोचमे सुरक्षा गार्ड, सफाई कर्मचारी आ टूर एस्कॉर्ट उपलब्ध रहत जाहिसँ तीर्थयात्रीकेँ यात्राक दौरान कोनो समस्याक सामना नहिं करय पड़य। एकर अतिरिक्त चिकित्सा सुविधा सेहो उपलब्ध रहत। मेडिकल टीममे बहुत रास डॉक्टर सेहो होएत। टिकट बुकिंगक लेल तीर्थयात्री टेलीफोन नंबर 8595937731 सँ जानकारी प्राप्त कऽ सकैत छथि, 8595937732। एकर अलावा सहरसासँ यात्री बुकिंग लेल 8595937732 हेल्पलाइन नंबर जारी कयल गेल अछि। आईआरसीटीसी सहरसासँ समस्तीपुर वा दरभंगा जायवला तीर्थयात्रीसभकेँ भारत गौरव ट्रेन पकड़बाक लेल विशेष सुविधा प्रदान कयलक अछि। एकर तहत आईआरसीटीसी सहरसासँ दरभंगा वा समस्तीपुर जायवला ट्रेन पकड़य वाला तीर्थयात्री तक बस वा ट्रेनसँ यात्राक खर्च वहन करत।