बिहार सरकारक मंत्री नीरज कुमार सिंहक सड़क पर नमाज आ मांस बंदी पर देल गेल बयानसँ राजनीतिक विवाद छिड़ गेल अछि। ओ सड़क पर नमाज पढ़बा पर आपत्ति जतौलनि आ मांस बंदी केर मांगक समर्थन कयने छथि।
विपक्षी दल सभ हुनकर बयानक कड़ा निंदा कऽ रहल अछि आ इस्तीफाक मांग कऽ रहल अछि। बिहार सरकारक मंत्री आ बीजेपी केर फायर ब्रांड नेता नीरज कुमार सिंहक बयानक बाद राज्यमे सियासी घमासान मचल अछि। नीरज कहलनि कि बाट चलबाक लेल अछि, नमाज पढ़बाक लेल नहि। ई बहुते दुखद अछि। नमाज पढ़बाक लेल हुनका सभ लग मस्जिद अछि, मदरसा अछि। कतौह स्थान नहि भेटल त’ बड़का-बड़का कब्रिस्तान अछि, ओतय जाइ सेहो पढ़ि सकैत छथि। कहां दिक्कत अछि ? वक्फ केर कानून अहाँ जानि रहल छी, जत’ चारि दिन नमाज पढ़ि लेब त’ कहब जे ई वक्फ बोर्डक जमीन अछि। ई नियम गलत अछि, तरिका गलत अछि।
नीरज कुमार सिंह कहलनि, हमर मानब अछि जे बिहारमे सड़क पर नमाज कतौह नहि हेबाक चाही। मुख्यमंत्री देखता, विचार करता। जनता आवाज उठा रहल अछि।
ओ इहो कहलनि जे बिहारमे अपन मॉडल अछि। एहिठाम सुशासन छै। एहिठाम सीएम नीतीश कुमार छथि। एहिठाम कोनो तरहक गड़बड़ी नहि भ’ पाओत। जत’ धरि जगराताक बात छै, से ओहो जगह पर होइत अछि। खेतमे होइत छै, सड़क पर कतौह नहि होइत छै। जतय संभव हेतै, ओहि ठाम बैन लागत।
नीरज कुमार सिंह इहो कहलथि, जँ हिन्दू समाज नॉनवेजसँ परहेज करैत अछि, जँ हुनक डिमांड छै जे ई बंद होय त’ बंद होब’ चाही। लोकक पूजा-पाठमे कठिनाई होइत अछि आ नॉनवेज देखिक’ सेहो परेशानी होइत अछि। लोक डिमांड करैत छथि त’ निश्चित रूपसँ बंद होब’ चाही। हम एहि केर समर्थनमे छी। लोक डिमांड करैत छथि, जत’ संभव होयत, ओहि ठाम बैन लागत। लोकक भावनाक रोकल नहि जा सकैत अछि। करोड़ों सनातनी जँ चाहैत छथि जे मांस-मछली पर बैन होय त’ हमहुं समर्थनमे छी।
विकासशील इंसान पार्टीक राष्ट्रीय प्रवक्ता देव ज्योति कहलथि जे ई बीजेपी अछि। नीरज कुमार सिंह बिहार सरकारक मंत्री छथि। मंत्री पद पर रहितो एहेन भावना ? अपने जहर उगलि रहल छी। आबयवाला समयमे जनता माफ नहि करत। सरकारक मंत्रीकेँ एहन भाषाक प्रयोग नहि करबाक चाही। एहेन व्यक्तिकेँ इस्तीफा द’ देबाक चाही। एहेन व्यक्तिकेँ महंगाई विषय पर बाज’ केर चाही। शिक्षा व्यवस्था, स्वास्थ्य व्यवस्था केर विषय पर बाज’ केर चाही। विधानसभामे अहाँ किछु विषय पर नहि बाजलहुं। किछु बातक जवाब नहि देलहुं। जनता क’ कि लाभ भेटत, से अपन दृष्टिमे अहाँ किछु नहि कहलहुं। एहेन तरिकासँ हिंदू-मुसलमान केर राजनीति करब।
