पाटलिपुत्र लोकसभा क्षेत्रसँ भाजपा उम्मीदवार आ पूर्व केन्द्रीय मंत्री रामकृपाल यादवक काफिला पर शनिदिन भेल गोलीबारीमे नौ गोटेकेँ आरोपी बनाओल गेल अछि। एहि मामिलाक जाँच आ आरोपीकेँ गिरफ्तार करबाक लेल एकटा विशेष जाँच दल (एसआईटी)क गठन कयल गेल अछि।
निवर्तमान सांसद आ पूर्व केन्द्रीय मंत्री रामकृपाल यादव आरोप लगओलनि अछि जे शनिदिन साँझ मसौढ़ी क्षेत्रमे हुनका पर गोली चलाओल गेल आ एकटा समर्थकक माथ फोड़ि देल गेल।
पटना (पूर्व) के पुलिस अधीक्षक भरत सोनी कहलखिन कि यादवक लिखित बयानक आधार पर एफआईआर दर्ज कयल गेल अछि। आरोपीकेँ गिरफ्तारीक लेल एसआईटी केर गठन कएल गेल अछि। एफ.आई.आर.मे नौ गोटेक नाम अभियुक्तक रूपमे देल गेल अछि। आरोपीकेँ गिरफ्तारीक लेल छापा मारल जा रहल अछि।
वास्तवमे, भाजपा समर्थकसभ तिनेरी गाम लग एकटा मतदान केन्द्रपर हंगामा कयलनि, ई आरोप लगबैत जे स्थानीय विधायक रेखा देवी एकटा मतदान केन्द्र गेलीह। एकर बाद आरोप अछि जे राजद समर्थक मुखिया रीना कुमारीक पति शशि शर्मा पर हमला कयलक आ हुनका संग मारि-पीट कयल गेल। कहल जाइत अछि जे सांसद प्रमुखक पतिकेँ देखय जा रहल छलाह, तखन हुनका पर गोली चलाओल गेल।
एहिसँ पहिने सारण लोकसभा क्षेत्रमे राजद उम्मीदवार रोहिणी आचार्य एकटा बूथ पर गेलाक बाद हंगामा भेल छल, जकर बाद हिंसक झड़पमे एक व्यक्तिक मृत्यु भऽ गेल आ दू गोटे घायल भऽ गेलाह। पाटलिपुत्र लोकसभा क्षेत्रमे भाजपा प्रत्याशी रामकृपाल यादवक मुकाबला राजद प्रमुख लालू प्रसाद यादवक बेटी मीसा भारतीसँ अछि।
एम्हर भाजपा ओबीसी मोर्चाक राष्ट्रीय मंत्री निखिल आनन्द पूर्व केन्द्रीय मंत्री रामकृपाल यादव पर भेल हमलाक उच्च स्तरीय जाञ्चक माँग करैत एकरा सुनियोजित षड्यंत्र बतौलनि अछि।
