बागेश्वर बाबाकेँ पुलिस बिहार अयबासँ रोकि देलक
बागेश्वर बाबाकेँ पुलिस बिहार अयबासँ रोकि देलक
*
पटना समदिया
*
बाबा बागेश्वरक नामसँ जानल जायवला धीरेन्द्र शास्त्रीकेँ काल्हि निर्धारित कार्यक्रमक लेल पुलिस-प्रशासनसँ अनुमति नहि भेटलनि। एहि लेल बाबा बागेश्वर बिहार नहि आबि रहल छथि। ओ एकटा वीडियो संदेश जारी कऽ लोकसभसँ वादा कयलनि जे ओ जल्दिये अयताह।
धीरेन्द्र शास्त्रीकेँ बिहार पुलिस वैशाली आबयसँ रोकि देलक। जानकारीक अनुसार बाबा बागेश्वर काल्हि अयबाक छल मुदा नहि अयलाह।
पुलिसक कहब अछि जे राघोपुर चारु दिसि गंगा नदीसँ घिरल पूर्ण रूपसँ नदीक तटीय क्षेत्रमे अछि। पहुँचक एकमात्र साधन बाँसक पुल आ नावक माध्यमसँ अछि, जे सुरक्षाक दृष्टिकोणसँ एतेक लोकक आवागमन लेल सही नहि बुझाइत अछि। चूँकि एतेक पैघ आयोजनक लेल पर्याप्त स्थान आ परिवहनक साधन उपलब्ध नहि अछि, तेँ कार्यक्रमक अनुमति नहि देल गेल अछि।
चूँकि प्रशासन एहि कार्यक्रममे भाग लेबाक अनुमति नहि देलक, पंडित धीरेन्द्र शास्त्री एकटा वीडियो जारी कयलनि जाहिमे लोकसभसँ वादा कयल गेल जे हमसभ जल्दी आयब। हम जरूर आयब। हम अहांके बादमे सूचित करब। कृपया अपन ध्यान राखू। ओ कहलनि जे हम सभ जल्दिये आबि आ आँहाँ सबके संग पाबनि मनायब।
जनतब जे बाबा बागेश्वरक आयोजनक तेसर बेर अनुमति नहि देल गेल अछि। काल्हि ५ मार्चकेँ बागेश्वर धामक पंडित धीरेन्द्र शास्त्रीकेँ शिव मन्दिर प्राण प्रतिष्ठा कार्यक्रममे भाग लेबाक छल, मुदा पुलिस प्रतिबन्ध लगा देलक। प्रशासनक अनुमान अछि जे एहि आयोजनमे पांच लाखसँ सात लाख लोक भाग लऽ सकैत छलथि। आबए-जायके लेल कोनो सुरक्षित रास्ता नहि अछि। फलतः सुरक्षाक दृष्टिसँ रोकब आवश्यक छल।
