महाविद्यालयमे पठन-पाठनक व्यवस्थाकेँ सुदृढ़ करबाक संग एक दर्जनसँ बेसी प्रस्ताव सभ पर सर्वसम्मतिसँ निर्णय केर संग अयाची मिथिला महिला महाविद्यालय बेनीपुरक शासी निकाय केर बैसार अनुमंडल पदाधिकारीक कार्यालय कक्षमे संपन्न भेल।
बैसारमे पछिला बैसारमे लेल गेल निर्णयक संपुष्टि करैत अनुमंडल पदाधिकारी सह महाविद्यालय शासी निकाय केर पदेन सदस्य शंभू नाथ झा द्वारा सचिव पदसँ मुक्त होयबा पर विस्तृत रुपसँ चर्चा कयल गेल।झा अपना आपकेँ समयाभावक कारणे सचिव पद पर बनल रहबामे अपन असमर्थता व्यक्त कयलन्हि। तकरा बाद विस्तृत विचारोंपरांत विश्वविद्यालय प्रतिनिधि प्रो० लावण्या कीर्ति सिंहकेँ महाविद्यालय शासी निकायक सचिव मनोनीत कयल गेल।
संगहि संग सरकारसँ प्राप्त अनुदान पर विस्तृत चर्चा करैत भुगतान लेल तीन श्रेणी निर्धारित कयल गेल जाहिमे शैक्षणिक स्तरक लेल डेढ़ लाख टाका, शिक्षकेतर कर्मी सभक लेल 1 लाख 25 हजार आ चतुर्थ वर्गीय कर्मचारी सभ लेल एक लाख टाकाक राशि निर्धारित कयल गेल। ओहि दौरान प्रभारी प्राचार्य केर अनुरोध पर विद्युत विभाग द्वारा निर्धारित कयल गेल जुर्माना राशिक भुगतान करैत सोलर ऊर्जा आधारित विद्युत व्यवस्था स्थापित करबाक निर्णय लेल गेल जकरा लेल प्रधानाचार्यकेँ अधिकृत कयल गेल।
ओहि दौरान प्रभारी प्राचार्य नवीन मिश्र पूर्व प्रभारी द्वारा महाविद्यालय अभिलेख हस्तगत नहि कराओल जयबाक कारणे अभिलेख अप्राप्त हेबाक बात बतौलनि जकरा गंभीरतासँ लैत अनुमंडल पदाधिकारी शंभूनाथ झा आ शासी निकाय केर अध्यक्ष विधायक प्रो० विनय कुमार चौधरी वर्तमान प्रभारी प्राचार्यकेँ नियमानुकूल कारवाई करबाक निर्देश दैत अगिला बैसारमे प्रस्ताव केर उपस्थापित करबाक निर्णय लेल गेल।
ओकरा संगहि प्रधान लिपिक विरुद्ध लगाओल गेल आरोप पर विश्वविद्यालय अधिनियमक अधीन कारवाईक लेल प्रभारी प्राचार्यकेँ अधिकृत कयल गेल आ अन्यान्य वित्तीय व्यय केर संबंधमे अंकेक्षणक बादे पूर्वक व्यय पर विचार विमर्श कयल जयबाक निर्णय लेल गेल। अंतर स्नातक स्तर पर भुगतानक संबंधमे बिहार इंटरमीडिएट शिक्षा परिषद आ विश्वविद्यालय नियमावलीक अनुसार भुगतान करबाक निर्णय लेल गेल ।
एहि अवसर पर शिक्षाविद् सदस्य मिथिलेश राय सहित अन्यान्य लोक उपस्थित छलाह।
