लोकसभाक १८म सत्र नव सरकारक गठनक बाद आइ प्रारम्भ भेल। प्रोटेम स्पीकर भर्तृहरि महताब प्रधानमंत्री नरेन्द्र मोदी, केन्द्रीय गृह मंत्री अमित शाह सहित कैबिनेट मंत्री आ विपक्षी सदस्यसभकेँ शपथ दियेलनि। एहि दौरान राहुल गांधी कहलनि जे संविधान पर हमला स्वीकार्य नहिं अछि।
एहि दौरान एकटा विशेष बात सबके ध्यान आकर्षित कयलक। विपक्षक सभ सांसद हाथमे संविधानक पुस्तक लऽ कऽ शपथ लेलनि, जखन कि सत्तारूढ़ दलक कोनो सांसद एहन नहिं कयलनि।
जखन कांग्रेस नेता राहुल गाँधीसँ पत्रकारसभ एहि विषयमे पूछताछ कयलनि तखन ओ पीएम मोदी आ अमित शाह पर कटाक्ष करैत जवाब देलनि।
ओ कहलनि, “जाहि तरहें प्रधानमंत्री नरेन्द्र मोदी आ अमित शाह संविधानपर हमला कऽ रहल छथि, ओ हमरा लेल स्वीकार्य नहिं अछि, तेँ हम शपथ लैत समय संविधान पकड़लौंह अछि।”
जखन राहुल गाँधीसँ पूछल गेल जे की ओ एना कऽ कोनो संदेश देबाक प्रयास कऽ रहल छथि तखन ओ कहलनि जे ई बिल्कुल एकटा संदेश अछि। हम अहाँ सभकेँ एकटा बात कहि दैत छी जे, कोनो शक्ति भारतक संविधानकेँ छू नहिं सकैत अछि। हमरासभक लेल भारतक संविधान सब किछु अछि आ जे कियो एहि पर हमला करत, हम ओकरा नहिं छोड़ब।
एहि दौरान राहुल पत्रकारसभकेँ संविधानक पुस्तक सेहो देखौलनि आ कहलनि जे देखू ई हमरा सभक लेल सब किछु अछि।
एम्हर राहुलसँ भाजपा द्वारा २५ जूनकेँ ‘काला दिवस’ मनयबाक विषयमे पूछल गेल तऽ ताहि पर ओ कोनो उत्तर नहिं दैत कन्नी काटि लेलनि।
२५ जून १९७५ केँ देशमे आपातकाल लागू कयल गेल छल। आपातकालक अवधिमे कतेको लोककेँ जेलमे राखि देल गेल छल। एतबे नहिं, ओहि समय मीडिया पर सेहो हमला भेल छल। बहुत रास पत्रकारकेँ सेहो जेलक पाछू भेज देल गेल छल। तहियासँ भाजपा द्वारा २५ जूनकेँ ‘काला दिवस’क रूपमे मनाओल जाइत अछि।
