बिहारक सिवानमे जहरीला शराब तबाही मचा रहल अछि। एखन धरि एकरा पीलाक बाद २० लोकक मृत्यु भऽ चुकल अछि। जिला अस्पताल आ पुलिस दुनू द्वारा एकर पुष्टि कयल गेल अछि।
बिहारक सिवानमे जहरीला शराब पियलासँ मरयवलाक संख्या बढ़ि कऽ २० भऽ गेल अछि। जिला एसपी अमितेश कुमार एकर पुष्टि कयलनि अछि। ओतहि छपरामे जहरीला दारू पियलासँ मरयवलाक संख्या बढ़ि कऽ चारि भऽ गेल अछि। सीवान आ छपरामे माहूरवाला शराब पीबाक कारण कुल २४ लोकक मृत्यु भऽ गेल अछि। लगभग २० सँ २५ लोक एखनो अस्वस्थ छथि।अधिकांशक इलाज सिवानक सदर अस्पतालमे चलि रहल अछि जखन कि किछुक इलाज छपरामे चलि रहल अछि। जखन कि किछुकेँ पटना रेफर कएल गेल अछि।
छपराक पुलिस अधीक्षक कुमार आशीष कहलनि जे एहि मामिलाक जाँचक लेल एकटा विशेष जांच दल (एसआईटी)क गठन कयल गेल अछि। तीनटा लोककेँ गिरफ्तार कयल गेल अछि आ आठ गोटेक विरुद्ध प्राथमिकी दर्ज कयल गेल अछि।
संगहि संग स्थानीय चौकीदार आ पंचायत बीट पुलिस अधिकारीकेँ सेहो निलंबित कऽ देल गेल अछि। विभागीय कारवाईक हिस्साक रूपमे मशरक थानाक प्रभारी आ मशरक क्षेत्रक एएलटीएफ प्रभारीसँ स्पष्टीकरण मांगल गेल अछि। जिलाधिकारी मुकुल कुमार गुप्ताक अनुसार भगवानपुर थाना आ भगवानपुर थानाक एएसआई केर खिलाफ कानूनी कारवाई कयल जा रहल अछि।
जहरीला शराब पीबाक कारण कतेको लोकक मृत्युक लेल विपक्ष सरकारक आलोचना कयलक अछि। राजद नेता मृत्युंजय तिवारी कहैत छथि जे जहरीला शराब पीबाक कारण लोकक मृत्यु भेल अछि। ई बहुत दुख आ चिन्ताक विषय अछि जे शराबबंदी कानूनक बावजूद बिहारमे हर बेर देखल जाइत अछि जे कोना जहरीला शराबसँ लोकक मृत्यु भऽ जाइत अछि।
तिवारी आरोप लगओलनि जे शराब माफियाकेँ सरकारक सुरक्षा भेटैत अछि आ जाबत धरि हुनका लग सरकारक सुरक्षा अछि, निषेध लागू अछि मुदा कानूनक उल्लंघन कएल जा रहल अछि। एनडीए सरकार केर एकर कोनो चिंता नहिं अछि। जखन निषेध कानून लागू होइत अछि तखन एहि तरहें नकली शराब कोना भेटि रहल अछि ?
माहूरवाला शराब पीबाक कारण कतेको लोकक स्वास्थ्य सेहो बिगड़ि गेल आ दृष्टि सेहो गेल। कतेको लोककेँ सिवान आ छपराक सरकारी अस्पतालमे भर्ती कयल गेल अछि। मृतकमेसँ एकटाक रिश्तेदार कहलनि जे १५ अक्टूबरकेँ शराब पीलाक बाद ओकर देवर बीमार भऽ गेल छलाह। ओ १५ अक्टूबरकेँ शराब पीने छलाह आ काल्हि साँझ हुनक स्वास्थ्य बिगड़य लागल। ओ किछु नहिं देखि सकलाह, तखन हम हुनका अस्पताल लए अएलहुं।
