घटना बसनही थाना क्षेत्रक अछि, जतय बाइक सवार अपराधीसभ पुलिसक टीम पर हमला क’ देलक। अपराधीसभक गोलीबारीमे एकटा चौकीदार गंभीर रूपेँ घायल भ’ गेल, जे सदर अस्पतालमे भर्ती कयल गेल। सदर अस्पतालक डॉक्टरसभ घायल पुलिसकर्मीकेँ बेसी नीक इलाजक लेल हायर सेंटर रेफर क’ देलथि।
घायल चौकीदारक नाम राजेन्द्र पासवान बताओल जा रहल अछि, जे बसनही थानामे कार्यरत अछि। अपराधीसभ द्वारा चलाओल गेल गोली चौकीदारक कंधामे जाकऽ लगल। गोली कंधामे फंसले छल।
बसनही थाना अध्यक्ष किछु पुलिसकर्मी सभक संग बसनही थाना क्षेत्रक संथाली टोला लग सड़क पर एकटा बाइक पर सवार तीन अपराधीकेँ रोकबाक प्रयास कएल। तकरा बाद अपराधीसभ पुलिस पर गोली चला देलक आ गोली पुलिस टीममे शामिल चौकीदारकेँ लागि गेल। घटनाक बाद जखनि पुलिस अपराधीकेँ खदेड़लक तऽ अपराधी मकईक खेत होइत भागल, जेकर बाद पुलिस खदेड़ि कऽ एकटा अपराधीकेँ धरि दबोचलक। मुदा, अन्य अपराधी भागयमे सफल रहल।
घटनाक बाद मौका पर जिलाक एसपी समेत तमाम पुलिस अधिकारी पहुँचलथि। अन्य अपराधी सभक तलाश कएल जा रहल अछि। एहिसँ पहिने सेहो बिहारमे पुलिसकर्मी सभ पर हमलाक कतेको घटना सामने आबि चुकल अछि। पिछला 15 दिनमे पुलिस पर हमलाक छह घटना सामने आबि चुकल अछि। होलीक समय सेहो पुलिसकर्मी सभ पर कएकटा हमला भेल छल, जाहिमे दू पुलिसकर्मीक मृत्यु सेहो भेल छल।
