एहि हमलामे एकटा पुलिस अधिकारीक घायल होयबाक सूचना अछि, जखन कि शराब माफिया द्वारा पुलिसक दूटा गाड़ीकेँ पूर्ण रूपसँ क्षतिग्रस्त कऽ देल गेल अछि।
बिहारमे शराबबंदी कानून लागू भेलाक कतेको साल बीत चुकल अछि, मुदा शराब माफिया’क शराबक बिक्री आ उत्पादन जारी अछि। ई घटना पटना जिलाक पालीगंज अनुमंडलक रानी तालाब थानाक राघोपुर मुसहरी क्षेत्रमे भेल अछि, जतय शनिदिन अवैध शराबक विरुद्ध छापा मारबाक लेल पुलिसक टीम पहुँचल आ शराब माफिया हुनका पर हमला कयलक। एहि हमलामे एकटा पुलिस अधिकारी घायल भऽ गेलाह। घटनाक सूचना भेटलाक बाद लगपासक कतेको थानाक पुलिस आ डीएसपी सेहो घटनास्थल पर पहुँचलाह, जतय पुलिसक टीम हमलावर, शराब माफियाक खोजमे लागल अछि।
प्राप्त जानकारीक अनुसार रानी तालाब थानाक पुलिसकेँ होली पर्वक दौरान राघोपुर मुशहरीमे अवैध शराबक व्यापार आ देशी मदिराक उत्पादनक सूचना देल गेल छल। एकर बाद पुलिसक एकटा टीम राघोपुर मुशहरी पहुँचल आ छापा मारय लागल, तखनि अचानक शराब माफिया द्वारा पाथर फेंकल गेल।
एहि घटनामे एकटा पुलिस अधिकारी घायल भऽ गेलाह, जखन कि पुलिसक दूटा गाड़ीपर सेहो हमला भेल। दुनू गाड़ी पूरा क्षतिग्रस्त भए गेल छल। एम्हर घटनाक सूचना भेटलाक बाद पाली अनुमंडलक कतेको थानाक पुलिस सेहो घटनास्थल पर पहुँचल, जतय मुशहरीमे पुलिस टीम द्वारा छापा मारल जा रहल छल। पुलिस एखनि गाममे डेरा डालि रहल अछि।
