अररिया जिलासँ एकटा पैघ खबरि सामने आयल अछि। अपराधीसभकेँ पकड़बाक लेल पुलिस टीमक सङ्ग गेल एएसआई राजीव कुमारक मृत्यु भऽ गेलनि। अपराधीसभकेँ पकड़बाक लेल पुलिसक एकटा दल लक्ष्मीपुर गाम पठाओल गेल छल, मुदा ओतय हुनका पर हमला कयल गेल। एहि हमलामे फुलकहा थानाक एएसआई राजीव कुमार मारल गेलाह। अररियाक एसपी जनतब देलनि जे पुलिस आ आरोपीक बीच झगड़ाक दौरान एएसआई राजीव कुमारक मृत्यु भऽ गेल।
पुलिसक टीम देर राति फुलकाहा बजारमे छापा मारय गेल, जतय अपराधीसभकेँ पकड़बाक प्रयासमे झगड़ाक क्रममे एकटा एएसआईक मृत्यु भऽ गेल। राजीव रंजनकेँ गम्भीर स्थितिमे सदर अस्पताल आनल गेल, जतय मृत्यु घोषित भेलाक बाद हुनकर शवकेँ पोस्टमार्टम लेल पठाओल गेल।
खबरिक अनुसार एएसआई राजीव रंजन मुंगेर जिलाक
निवासी छलाह आ फुलकाहा पुलिस स्टेशनमे तैनात छलाह।
एकटा दोसर समाचारमे पछिला सप्ताह पटनाक रानीतालाब क्षेत्रमे अवैध शराबक बिक्री आ निर्माणमे शामिल तस्करक समर्थकक हमलामे तीन पुलिसकर्मी घायल भऽ गेलाह। ई घटना रानीतालाब थाना क्षेत्रक राघोपुर मुसहरी क्षेत्रमे भेल आ एहि संबंधमे एखनि धरि पाँच गोटेकेँ गिरफ्तार कयल जा चुकल अछि। रानीतालाब थानाक प्रभारी प्रमोद कुमार बतौलनि जे ई झड़प तखनि भेल जखनि राघोपुर मुसहरी क्षेत्रमे चलि रहल अवैध शराब निर्माण आ बिक्री गतिविधि पर पुलिस छापा मारि रहल छल। अचानक, अज्ञात लोकसभ पुलिस टीमपर हमला कयलक आ पथराव शुरू कऽ देलक, जाहिमे तीनटा पुलिसकर्मी घायल भऽ गेलाह। ओ पुलिसक दूटा गाड़ीकेँ सेहो क्षतिग्रस्त कए देलक।”
ओ बतौलनि जे अतिरिक्त पुलिसकर्मी तत्काल घटनास्थल पर पहुँचलाह आ घायलसभकेँ लगक स्वास्थ्य केन्द्रमे लऽ गेलाह। ओ कहलनि, “तीनू घायल पुलिस अधिकारीक हालत खतरासँ बाहर अछि।” थाना प्रमुख बतौलनि जे पुलिस मामिला दर्ज कऽ आरोपीकेँ तलाश शुरू कऽ देलक अछि। ओ कहलनि, “एखन धरि एहि मामिलामे पाँच गोटेक गिरफ्तारी भऽ चुकल अछि।” अप्रैल २०१६ सँ बिहारमे शराबक बिक्री आ सेवन पर प्रतिबंध अछि।
