रेल मंत्री अश्विनी वैष्णव रविदिन प्रयागराज पहुँचलाह। एतय ओ प्रयागराज स्टेशन पर चलि रहल कुम्भक तैयारीक समीक्षा कयलनि। एकर बाद ओ पत्रकारसभकेँ विस्तृत जानकारी देलनि।
रेल मंत्री कहलनि, “आइ हम प्रयागराज रेलवे स्टेशन पर महाकुम्भक तैयारीक समीक्षा कयलहुँ। पछिला अढ़ाई सालमे रेलवे अधिकारी उत्तर प्रदेश सरकारक संग प्रधानमंत्री नरेन्द्र मोदी आ मुख्यमंत्री योगी आदित्यनाथक मार्गदर्शनमे महाकुम्भक लेल पैघ स्तरपर तैयारी करबाक लेल काज कयलक अछि। एहि अवधिमे महाकुम्भसँ जुड़ल विभिन्न काजपर लगभग पाँच हजार करोड़ टाकाक निवेश कयल गेल अछि, आ एहि तैयारीसभक नियमित समीक्षा सेहो कयल जाइत अछि।”
ओ कहलनि, “एकर अतिरिक्त, सभ सम्बन्धित विभागक सङ्ग समन्वय राखल गेल अछि जाहिसँ कोनो लम्बित काज शीघ्रतासँ पूरा कयल जा सकय।” एहि बेर महाकुम्भक दर्शन करय बला पैघ संख्यामे भक्तलोकनिक आगमन होयबाक आशा अछि। एकरा देखैत राज्य सरकार विस्तृत तैयारी कयलक अछि। रेलवे सेहो एहि प्रक्रियामे अपन पूरा सहयोग देलक अछि। रेलवे एहि बेर ३,००० विशेष ट्रेन चलाओत। एकर अतिरिक्त, लगभग १०,००० नियमित ट्रेनक सेहो आयोजन कयल गेल अछि, जाहिसँ भक्तलोकनिकेँ यात्रामे सुविधा भेटत। एहि बेर कुम्भक लेल कुल १३,००० ट्रेनक व्यवस्था कयल गेल अछि, जे पछिला कुम्भक तुलनामे बहुत बेसी अछि।”
आगा ओ कहलनि, “एकर अतिरिक्त ई सेहो सुनिश्चित कयल गेल अछि जे सभ ट्रेनकेँ पूर्ण सुरक्षा आ सावधानीसँ प्रयागराज पठाओल जाय।” इंजनसँ जुड़ल कोनो समस्या नहिं होयबाक लेल अतिरिक्त विशेष व्यवस्था कयल गेल अछि। विशेष रूपसँ किछु ट्रेनकेँ पूर्ण रूपसँ तैयार कऽ एतय आनल गेल अछि, आ नियमित ट्रेनसभमे दुनू कातक इंजन सेहो लगाओल गेल अछि जाहिसँ कोनो ट्रेनकेँ बेर-बेर उल्टा नहि करय पड़य।”
ओ कहलनि, “एहि कुम्भक दौरान प्रयागराज आ वाराणसीक बीच पटरी दोहरीकरणक काज सेहो पूरा भऽ गेल अछि। एहि परियोजनाक अन्तर्गत १०० सालक बाद गंगा नदी पर एकटा नव पुल सेहो बनाओल गेल अछि। एकर परिणामस्वरूप रेलवेक क्षमतामे काफी वृद्धि भेल अछि। जतय पछिला कुम्भमे ७,००० ट्रेन चलल, एहि बेर लगभग १३,००० ट्रेन चलाओल जायत, जे संख्यासँ दुगुना अछि। एहि तरहेँ महाकुम्भक तैयारी बहुत पैघ स्तर पर कयल गेल अछि आ एहि बेर भक्तलोकनिकेँ यात्रामे कोनो तरहक समस्याक सामना नहिं करय पड़त।”
