जिलाक तुर्की थाना क्षेत्रमे बदमाश सभ शनिकेँ एकटा आभूषण दुकानमे हथियारक बल पर 15 लाख रुपयाक गहना आ नकदी लूटि लेलक। घटनाक बाद सभ बदमाश ओहि ठामसँ फरार भऽ गेल। पुलिस मामिलाक छानबीनमे जुटल अछि।
कहल जा रहल अछि जे सकरी चौकक पास स्थित एकटा ज्वेलर्सक दुकानमे छह अपराधी हथियारक संग पहुँचल। सबहक चेहरा ढकल छल। घटनाक अंजाम देलाक बाद सभ बदमाश हथियार लहराबैत भागि गेल। कहल जा रहल अछि जे ओ सब दूटा बाइक पर सवार भ’ कऽ आएल छल आ घटनाक अंजाम देलाक बाद वैशाली तरफ भागल।
घटनाक सूचना भेटलाक बाद तुरन्त तुर्की थानाक पुलिस टीम घटनास्थल पर पहुँचल आ जांचमे जुटल। ग्रामीण एसपी विद्या सागर सेहो घटनास्थल पर पहुँचि तहकीकात कएलनि।
ओ बतेलनि कि चारू-कातक सीसीटीवी फुटेजकेँ खंगालल जा रहल अछि। जानकारीक अनुसार, पूरा वारदात दुकानमे लागल सीसीटीवी कैमरामे कैद भऽ गेल। पुलिस सीसीटीवी फुटेजक आधार पर अपराधी सभक पहिचान कए गिरफ्तारीक लेल छापेमारी कऽ रहल अछि।
दुकानदार विकास कुमार बतेलनि कि दुकानमे घुसिते अपराधी सभ पहिने हथियारक बल पर हुनका कब्जामे लेलक आ फेर लॉकरसँ जेवरात आ नगद लऽ कऽ भागि गेल। कुल 15 लाख रुपयाक नुकसान भऽ गेल अछि। सब बदमाशक उम्र 20 सँ 25 बर्खक बीच होयत। ओ सभ टी-शर्ट आ जींसमे छल। एहि मामिलाक जांच आ अपराधी सभक गिरफ्तारी लेल विशेष टीम बनायल गेल अछि। पुलिस एहि मामिलकेँ लऽ कऽ चारू-कातक जिलामे सेहो छापेमारी कऽ रहल अछि।
जनतब जे मुजफ्फरपुरमे किछु दिन पहिने एकटा किराना दुकान आ एकटा थोक दवा कारोबारीक दूकानमे सेहो लूटपाट भऽ चुकल अछि।
