मिथिला क्षेत्रीय बिहारक अररिया जेलमे बंद एकटा कैदी जेलक छत पर चढ़ि फाँसी लगा कऽ आत्महत्या कऽ लेलक। मृत कैदीकेँ लटकल देखि जेल प्रशासन जल्दीए ओकरा सदर अस्पताल अररिया लऽ गेल, जतय ड्यूटी पर तैनात डॉक्टर ओकरा मृत घोषित कऽ देलनि। मृतक कैदी जोगबनी थाना क्षेत्रक पटेल नगर वार्ड नम्बर ७ निवासी शंकर भगतक पुत्र ३२ वर्षीय अमित भगत कहल जा रहल अछि। अमित भगत एनडीपीएस अधिनियमसँ जुड़ल एकटा मामिलामे १५ मईसँ जेलमे छलथि। जेल अधीक्षक जवाहर लाल प्रभाकर बतौलनि जे योग दिवसक अवसर पर शुक्रदिन जेल परिसरमे योग कार्यक्रम आयोजित कयल जा रहल छल। एहि दौरान अमित भगत योग करय लेल नहिं गेल आ जेलक छत पर लोहाक ग्रिलमे गमछा बान्हि फाँसी लगा लेलक। जेल प्रशासन द्वारा देखलाक बाद ओकरा सदर अस्पताल पठाओल गेल। जतय डॉक्टर बंदीकेँ मृत घोषित कऽ देलनि, जकर बाद मजिस्ट्रेटक देखरेखमे पोस्टमार्टम प्रक्रिया कयल गेल। मृतक कैदीक पत्नी सुमन देवी कहलनि जे ओ बृहस्पतिकेँ वीडियो कॉलिंगक माध्यमसँ अपन पतिसँ गप्प कयलनि। ओ बता रहल छलथि जे हुनकर टांगमे घाव अछि। तेँ हम कहलहुं जे दबाई लिय, जखन हम अबैत छी तखन हम अहां के पाइ देब, ओ कहलखिन ठीक अछि। एम्हर शुक्रदिन भोर ११ बजे संदीप नामक एकटा लड़काकेँ जेलसँ फोन आयल जे अमित भगत आत्महत्या कऽ लेने अछि। सुमन देवी नोर भरल आँखिसँ कहलनि, “हम काल्हि अपन पतिकेँ कहलहुँ जे कागजात पटना चलि गेल अछि आ एक मासक भीतर हुनका छोड़ि देल जायत। हमर पति आत्महत्या नहिं कए सकैत छथि, हुनका जेलमे मारि देल गेल अछि। हमर पतिक रातिमे मृत्यु भऽ गेल आ ई समाचार जेलसँ भोर ११ बजे आयल। मृतकक भाय दीपक भगत बतौलनि जे शुक्रदिन भोर १०:०० बजे जेल प्रशासन द्वारा हुनका सूचित कयल गेल जे हुनकर भाय अमित भगत आब एहि दुनियामे नहिं छथि, हुनका कहल गेल जे हुनकर भाय आत्महत्या कऽ लेने छथि। ओ कहलनि जे जतय धरि ओ अपन भायक विषयमे जनैत छथि, हुनक भाय ई नहि कऽ सकैत छथि। जेलरक लापरवाहीक कारण ई भेल अछि। जाबत धरि जेलरकेँ निलंबित नहिं कऽ देल जायत ताबत धरि ओ अपन भायक शव नहिं लऽ जायत।
