एहि मंदिरक पुनर्विकासक शिलान्यास 8 अगस्तकेँ अमित शाहक सीतामढ़ी यात्राक दौरान होयत। ई मंदिर 67 एकड़मे बनत आ एकर भीतर संग्रहालय, धर्मशाला, सीता वाटिका आ सभागार जँका बहुत रास सुविधा होयत। एहि परियोजना लेल कुल 882.87 करोड़क बजट तय कयल गेल अछि, जाहिमे सँ 137 करोड़ टका पुरान मंदिर आ ओकर परिसरक जीर्णोद्धार पर खर्च होएत। पर्यटनसँ जुड़ल काज पर 728 करोड़ टकाक उपयोग होएत, जखनि कि मंदिरक रखरखावक लेल 10 साल धरि 16 करोड़ रूपया आवंटित कयल जाएत।
केंद्रीय गृहमंत्री अमित शाह 8 अगस्तकेँ बिहारक सीतामढ़ी जिलाक पुनौराधाममे जानकी मंदिरक पुनर्विकाससँ संबंधित परियोजनाक शिलान्यास करताह, जे देवी सीताक जन्मस्थली मानल जाइत अछि।
अधिकारी कहलनि जे 882.87 करोड़सँ बेसीक लागतसँ एहि परियोजनाक शिलान्यास समारोहमे बिहारक मुख्यमंत्री नीतीश कुमार, कतेको केंद्रीय मंत्री आओर अन्य गणमान्य लोक सेहो शामिल हेताह। भारतीय जनता पार्टीक बिहार इकाईक प्रवक्ता नीरज कुमार कहलनि जे, केंद्रीय गृहमंत्री अमित शाह 8 अगस्तकेँ सीतामढ़क पुनौराधाममे ‘जानकी मंदिर’क पुनर्विकाससँ जुड़ल परियोजनाक शिलान्यास करताह। बिहारक लोक ख़ास कय मिथिला लेल ऐतिहासिक दिन होएत।
कुमार कहलनि जे 67 एकड़मे पसरल भव्य मंदिरक पुनर्विकाससँ जुड़ल एहि परियोजनाक शिलान्यास मंत्रक जापक बीच कयल जाएत। राज्यक पर्यटन विभाग एहि परियोजनाक तैयारी शुरू कय देने अछि, जे 11 महीनाक भीतर पूरा हेबाक संभावना अछि। ओ कहलनि जे गृहमंत्री शुक्रदिन भोरमे दरभंगा पहुंचताह आ ओतयसँ सीतामढ़ी लेल विदा हेताह। 1 जुलाईकेँ राज्य मंत्रिमंडल मंदिर परिसरक एकीकृत विकास लेल 882.87 करोड़ टकाक मंजूरी दऽ चुकल छल। कुल राशिमे सँ 137 करोड़ रूपया पुरान मंदिर आ ओकर परिसरक विकास पर खर्च होएत, जखनि कि 728 करोड़ रूपया पर्यटनसँ जुड़ल काजमे खर्च होएत। एकर अलावा 10 साल धरि व्यापक रखरखाव पर 16 करोड़ रूपया खर्च होएत। कुमार कहलनि जे बिहार राज्य पर्यटन विकास निगम एहि परियोजनाकेँ लागू करत। ओ कहलनि जे राज्य सरकार हालमे मंदिरक निर्माण आ पुनर्विकास लेल मुख्य सचिवक नेतृत्वमे नौ सदस्यीय ट्रस्टक गठन कयलक अछि।
कुमार कहलनि जे, श्री राम जन्मभूमि तीर्थ क्षेत्र, अयोध्याक तर्ज पर व्यापक विकास होयत। ओ कहलनि जे, सीतामढ़ी जिला मुख्यालयसँ करीब पांच किलोमीटर पश्चिममे स्थित पुनौराधाममे भारी संख्यामे तीर्थयात्री (देशी आ विदेशी) अबैत छथि। मंत्रिमंडल एहि परियोजना लेल नोएडा स्थित ‘मेसर्स डिजाइन एसोसिएट्स इंक’केँ सलाहकारक रूपमे नियुक्तिकेँ सेहो मंजूरी दऽ देलक अछि। ई फर्म मास्टर प्लान तैयार करय आ राम जन्मभूमि ट्रस्टक वास्तुशिल्प सेवा देबयमे लागल छल। एहि बीच प्रधानमंत्री नरेंद्र मोदी 22 अगस्तकेँ बिहारक गयाजी जिलाक दौरा करताह, जतय ओ कतेको विकास परियोजना शुरू करताह। उपमुख्यमंत्री सम्राट चौधरी बुधदिन पत्रकारसँ बात करैत कहलनि जे, प्रधानमन्त्री मोदी २२ अगस्तकेँ गयाजीक भ्रमण करताह, जतय ओ जनसभाकेँ सम्बोधन करताह आ कतेको विकास परियोजनाक शुभारम्भ करताह।
