जन सुराजक संयोजक प्रशांत किशोर राजद पर जोरदार निशाना साधलनि अछि। कहलनि “ई लोक सभ भ्रष्टाचार आ गुंडागर्दीसँ कहियो ऊपर नहिं उठि सकैत छथि।”
राजदक (१३ मई) द्वारा आयोजित एकटा चुनावी सभमे विधायक तेज प्रताप यादव पर एकटा कार्यकर्ताकेँ धक्का देबाक लेल जन सुराजक संयोजक प्रशांत किशोर कटाक्ष कयलनि अछि। ओ कहलनि जे बिहारक लोक मानैत छथि जे ई लोक जाति, हिन्दू-मुस्लिम, भ्रष्टाचार आ गुंडागर्दीसँ ऊपर राजनीति नहिं कऽ सकैत छथि।
प्रशांत किशोर कहलनि, “लालू-नीतीश पिछला ३० सालसँ बिहार पर शासन कऽ रहल छथि आ सबसँ बेसी विश्वास तोड़बाक काज सेहो इएह सब कयलनि अछि। ३० सालसँ नहिं तऽ गरीबी कम भेल अछि आ ने बिहारक लोकक पलायन रुकल अछि। शिक्षा व्यवस्थामे सुधार नहिं भेल अछि, रोजगार भेटल नहिं अछि, तऽ अहाँ कोन विश्वासक बात कऽ रहल छी ?”
प्रशांत किशोर आगू कहलनि जे अहाँ पाइ केर नाम पर, जातिक नाम पर किछु लोककेँ इकट्ठा कऽ लैत छी। तेजस्वीकेँ एहि बेर बुझि जेबाक चाही जे काठक हांडी बेर-बेर नहिं चढ़ैत अछि। एहि बेर जनता हुनकर बातमे आबयवाला नहिं अछि।
जे लोक सभ लालू यादव आ हुनक बच्चाक सरकार देखलनि अछि ओ मानैत छथि जे ई लोक जाति-पाति, हिन्दू-मुस्लिम, भ्रष्टाचार आ गुंडागर्दीसँ ऊपर उठि राजनीति नहिं कऽ सकैत छथि। ई ४ टा बिंदु राजदक चरित्रमे अछि आ ओ ओहिसँ ऊपर नहिं उठि सकैत अछि।
वास्तवमे सोम (१३ मई) केँ लोकसभा चुनावक लेल मीसा भारतीक नामांकनक दिन राजद द्वारा चुनावी सभाक आयोजन कयल गेल छल। एम्हर मंच पर उपस्थित मीसा भारतीक भाय आ विधायक तेज प्रताप कोनो बात पर क्रोधित भऽ गेलाह आ एकटा कार्यकर्ताकेँ धक्का देलनि। कने काल धरि वातावरण ओतए गर्म भऽ गेल। मीसा भारती सेहो आश्चर्यचकित छलीह। तखन पार्टीक नेता शक्ति यादव आ आन लोकनि एहि मामिलाकेँ शान्त कयलनि।
आब कतेको दलक नेता एहि मामिलाकेँ जोर-शोरसँ निशाना बना रहल छथि। प्रशांत किशोर सेहो राजद शासन पर कटाक्ष करैत कहलनि जे ई लोक एहने राजनीति कऽ सकैत छथि। एहिसँ उपर उठि इ किछु नहिं कऽ सकैत छथि। जनता हिनका सभकेँ पहिचान चुकल अछि। ओ इशारामे तेजस्वी यादवकेँ बता देलनि कि एहि बेर हुनका कामयाबी भेटयवाला नहिं अछि।
