जयनगर प्रखंडक डोरवार पंचायतक कुआढ़ गामक 15 महादलित पर्चाधारी परिवारक पीड़ित सदस्य सभ पर्चा वला जमीन पर कब्जा आर भू स्वामी सभसँ सुरक्षा दिएबाक मांग के ल’ बुध दिन जयनगरमे भाकपा माले केर बैनर केँ नीचा मशाल जुलूस निकाललक। ई जनतब दैत माले केर प्रखंड सचिव भूषण सिंह बतौलैन्ह जे जयनगर अंचल अभिलेख संख्या 4 /2004 – 2005 अंतर्गत निर्गत पर्चाकेँ आधार पर पर्चाधारी सभकेँ ओहि भूमि पर दखल कब्जा दिएबाक, अवैध निर्माण पर रोक लगेबाक आर आंदोलनकारी पीड़ित पर्चाधारी परिवारकेँ सुरक्षा प्रदान करबाक मांग के ल’ दर्जनाधिक पर्चाधारी परिवारक सदस्य सभ भाकपा-मालेकेँ नेतृत्वमे डीबी कॉलेजसँ दुल्लीपट्टी धरि मशाल जुलूस निकाललैन्ह।
डीबी कॉलेज चौक पर आयोजित सभा केर संबोधित करैत प्रखंड सचिव सिंह कहलैन्ह जे जयनगर अंचल अंतर्गत कतेको बरख पहिले कुआढ़ गाम सङ्ग सैकड़ो भूमिहीन महादलित परिवारकेँ भूहदबंदी योजना अंतर्गत आबए वला भूमिक पर्चा प्रशासन द्वारा देल गेल छल। पर्चा देलाक उपरांत स्थानीय प्रशासनक लापरवाहीख कारणें एखनि धरि पर्चा वला भूमि पर लाभुक सभकेँ कब्जा दियाबयमे प्रशासन नाकाम रहला। एम्हर अवैध भूस्वामी सभ पर्चा वला भूमि पर अवैध निर्माण कऽ रहलाह। प्रसाशन आ भू-माफिया सबहक मिलीभगतसँ अवैध रूपसँ ओहि जमीनक खरीद-बिक्री सेहो कयल जा रहल अछि। एतबहग नहिँ महादलित परिवारक अवैध भूस्वामीक लठैत सभ प्रशासनिक मिलीभगतसँ फर्जी मुकदमामे उलझाबय आ हमला करबाक योजना सेहो बनाओल जा रहल अछि।
ओ कहलैन्ह जे भाकपा-माले स्थानीय प्रशासनक जनविरोधी नीतिक विरुद्ध आर महादलित पर्चाधारी सभकेँ देल गेल भूमि पर दखल कब्जा दिएबाक, अवैध निर्माण पर रोक लगेबाक आर आंदोलनकारी सबहक जानमाल केर सुरक्षाक मांग केर ल’ आगाँ आंदोलन आओर तेज करबाक आह्वान कयल गेला।
सभाकेँ जागेश्वर राम, सीताराम राम, गरभू राम, रामनारायण राम, अनिता देवी, लीला देवी, फूल चंद राम, रामपारी देवी, ललिता देवी, रामचंद्र राम सङ्ग कतेको लोक संबोधित केलैन्ह। एहि अवसर पर कतेको लोक आंदोलनमे शामिल भेलैथ।
