केन्द्रीय कपड़ा उद्योग मंत्री आ बेगूसरायक सांसद गिरिराज सिंह आरोप लगओलनि अछि जे देशक लगभग सभ राज्यमे मतदाता सूचीमे पैघ स्तरपर व्यवस्थित हेरफेर भेल अछि आ एकर जाँचक आह्वान कयलनि।
केन्द्रीय मंत्री गिरिराज सिंह शनिदिन कहलनि जे लोकसभा चुनावक दौरान पैघ संख्यामे हिन्दू मतदाता मतदानसँ वंचित रहलाह। हुनक नाम काटि देल गेल छल। मतदाते सूचीमे नामक सोझाँ ‘डिलीट’ लिखल छल। मतदाता पहचान पत्र रहलाक बादो मतदाता सूचीमे नाम नहिं छल। दोसर दिसि, मुस्लिम बहुल क्षेत्रमे मतदाता सूचीमे अभूतपूर्व वृद्धि देखल गेल अछि।
ओ स्पष्ट स्वरमे कहलनि जे ई एकटा राज्यक विषय नहिं अछि। विधानसभा फोटोयुक्त निर्वाचक नामावलीक गहन पुनरीक्षण २००२ केर बाद नहिं भेल अछि।
बेगूसराय संसदीय आ झारखण्डक राजमहल विधानसभाकेँ पत्रकारक लेल एकटा मॉडल प्रदान करैत ओ कहलनि जे २०१९ मे राजमहलक एकटा बूथमे ६७२ मतदाता छल, जखन कि २०२४ मे एहि बूथमे १४६१ मतदाता भऽ गेल आ एकटा बूथ केर दू टा बूथमे बदलि देल गेल। एकरा ‘वोट जिहाद’ आ ‘बूथ जेहाद’ बताबैत सिंह कहलनि जे ई मात्र दू प्रदेशक बात नहिं अछि, ई सभ प्रदेशमे भऽ रहल अछि।
ओ कहलनि जे एहि संबंधमे ओ बिहारक सभ बूथक सर्वे करा रहल छथि, जकर रिपोर्ट सेहो आबय लागल अछि।
केन्द्रीय मंत्री कहलनि जे, जँ चुनाव आयोग आ सभ राज्यक निर्वाचन आयोग २०१४ सँ २०२४ धरि सभ बूथमे मतदाताक बढ़ल संख्याक तुलनात्मक अध्ययन करैत अछि तखनि स्थिति स्पष्ट भऽ जायत।
