उत्तर प्रदेशमे मन्दिरक खोज आ उत्खननक मामिला आइ-काल्हि बड्ड लोकप्रिय अछि। सम्भलक बादसँ कतेको ठाम नव मन्दिर भेटि रहल अछि। समाजवादी पार्टीक प्रमुख अखिलेश यादव रविदिन दावा कयलनि जे लखनऊमे मुख्यमंत्री योगी आदित्यनाथक सरकारी निवासक नीचा शिवलिंगक खुदाई होयबाक चाही।
समाजवादी पार्टीक प्रमुख अखिलेश यादव रविदिन लखनऊमे पार्टी कार्यालयमे संवाददाता सभसँ बातचीत कऽ रहल छलाह। ओ कहलनि, “मुख्यमंत्री निवासक नीचा शिवलिंग अछि। ई हमरा जानकारी अछि। एकर खुदाई सेहो करबाक चाही। अखिलेश एहिसँ पहिने सम्भलमे कयल जा रहल खुदाईकेँ सेहो निशाना बनौने छलाह।
ओ कहलनि जे सरकार ध्यान भटकाबय लेल जानिबूझि कऽ नव तरीका अपना रहल अछि। सब जगह खुदाई चलि रहल अछि। हुनकालोकनिक हाथमे “विकासक नहि अपितु विनाशक रेखा” अछि।
अखिलेश यादव कहलनि जे महाकुंभक लेल निमंत्रण नहि देल जाइत अछि। कुम्भमे लोक स्वयं अबैत छथि। इहे हम अपन धर्ममे सीखलहुं। की करोड़ो लोक अबैत छथि, की हुनका आमंत्रित कएल जाइत अछि ? ई सरकार अलग अछि।
वास्तवमे शनिकेँ मुख्यमंत्री योगी केंद्रीय गृह मंत्री अमित शाह आ रक्षा मंत्री राजनाथ सिंहकेँ महाकुंभमे शामिल हेबाक लेल आमंत्रित कयने छलाह।
अखिलेश कहलनि, “सरकारकेँ कठघरामे ठाढ़ करब हमर जिम्मेदारी अछि। जखनि सपा सरकारक अधीन कुम्भ मेला आयोजित भेल छल, तखनि एकर अध्ययन हार्वर्ड विश्वविद्यालय द्वारा कयल गेल छल। महाकुम्भक आयोजन सुचारू रूपसँ होयबाक लेल एसपी सहयोग करबाक लेल तैयार अछि। मुदा बिजली, पुलक काज एखनो अधूरा अछि। सरकारकेँ कठघरामे ठाढ़ करब हमर जिम्मेदारी अछि।
इलेक्ट्रॉनिक वोटिंग मशीन पर अखिलेश यादव कहलनि कि आइयो जर्मनीमे बैलेट पेपरसँ मतदान होइत अछि, मुदा भारतमे ईवीएम केर खेल चलि रहल अछि। ओ कहलनि जे आगरा-लखनऊ एक्सप्रेस-वे जर्मन सड़क देखलाक बाद बनाओल गेल छल, जे एखनो देशक सबसँ नीक सड़क अछि। दुनिया कतए पहुँचल अछि ? हम कतए उलझल छी ? ओ दावा कयलनि जे आबयवला दिनमे उत्तर प्रदेशक जनता बदलाव अनत।
