अहमदाबाद दुर्घटनाक बाद डीजीसीए विमानन सुरक्षाक संबंधमे कार्यवाही शुरू कय देलक अछि। डीजीसीए एयर इंडिया केर आदेश देलक अछी कि डिवीजनल वाइस प्रेसिडेंट सहित अपन तीन अधिकारीकेँ क्रू शेड्यूलिंग आ रोस्टरिंगसँ जुड़ल सब भूमिका आ जिम्मेदारीसँ हटाओल जाए।
नागरिक उड्डयन महानिदेशालय (डीजीसीए) २० जूनकेँ अपन आदेशमे एयर इंडियासँ ईहो कहलक कि एहि अधिकारीक खिलाफ तुरंत अनुशासनात्मक कार्यवाही शुरू कयल जाय। डीजीसीए केर आदेशक अनुसार तीनू अधिकारीमे एयरलाइनक एकटा डिवीजनल वाइस प्रेसिडेंट सेहो शामिल अछि। डीजीसीए एयर इंडिया केर 10 दिनक भीतर रिपोर्ट जमा करबा लेल कहलक अछि।
अपन आदेशमे डीजीसीए कहलक, एयर इंडिया बेर-बेर लाइसेंसिंग, आराम आ फिटनेस केर जरूरतमे चूकक बावजूद उड़ान दल केर समयबद्धता आ संचालनमे लापरवाही बरतलक । ई लापरवाही केर पता आर्म्ससँ सीएई फ्लाइट आ क्रू मैनेजमेंट सिस्टममे संक्रमण केर बाद एगो समीक्षाक दौरान करल गेल छल । एआरएमएस (एयर रूट मैनेजमेंट सिस्टम) एकटा सॉफ्टवेयर प्लेटफॉर्म छै जेकर उपयोग एयरलाइंस द्वारा विभिन्न परिचालन आ प्रबंधन कार्य लेल कयल जाइत अछि। एहिमे क्रू रोस्टरिंग आ फ्लाइट प्लानिंग आदि शामिल अछि।
डीजीसीए केर आदेशमे कहल गेल अछि कि समीक्षाक दौरान मिलल निष्कर्ष चालक दल केर समयबद्धता, अनुपालन निगरानी आ आंतरिक जवाबदेहीमे विफलताक तरफ इशारा करैत अछि । लापरवाही केर बावजूद जिम्मेदार प्रमुख अधिकारीक खिलाफ कड़ा अनुशासनात्मक कार्रवाई नहिं भेल। अधिकारी सब अनधिकृत आ गैर-अनुपालन चालक दलक जोड़ी, अनिवार्य लाइसेंसिंग, नवीनता केर मानदंड आ शेड्यूलिंग प्रोटोकॉलकेँ उल्लंघन, निरीक्षण नहि कयल सहित गंभीर चूकमे शामिल रहल। डीजीसीए एयर इंडियाकेँ चेतावनी देलक कि भविष्यमे चालक दल केर समयबद्धताक उल्लंघन लाइसेंस निलंबन आ परिचालन प्रतिबंध सहित सख्त कार्यवाही होबय वला अछी।
डीजीसीए (सिविल उड्डयन महानिदेशालय) एयर इंडिया केर जवाबदेह प्रबंधककेँ कारण बताउ नोटिस जारी कयलक अछि। नोटिसमे कहल गेल अछि कि एयर इंडिया केर जवाबदेह प्रबंधक 16 मई, 2025 आ 17 मई, 2025 केँ बेंगलुरुसँ लंदन (AL133) लेल दू उड़ान संचालित कयलक। डीजीसीए अधिकारीसँ सात दिनक भीतर जवाब देबा लेल कहलक अछि जे उल्लंघनक लेल उचित प्रवर्तन कार्यवाही किएक नहि शुरू कयल जयबाक चाही ?
एयर इंडिया केर कहब अछि जे एहि आदेशकेँ लागू कएल गेल अछि।
डीजीसीए केर आदेशक बाद एयर इंडिया कहलक, हम डीजीसीए केर निर्देशकेँ स्वीकार कय आदेशकेँ लागू कय देने छि। कंपनीक मुख्य संचालन अधिकारी इंटीग्रेटेड ऑपरेशन कंट्रोल सेंटर (आईओसीसी) केर देखरेख करताह। एयर इंडिया ई सुनिश्चित करय लेल प्रतिबद्ध अछि कि सुरक्षा प्रोटोकॉल आ मानक प्रक्रियाक पूरा पालन कयल जाय।
जनतब जे एयर इंडियाक विमान अहमदाबादमे दुर्घटनाग्रस्त भऽ गेल छल जे 12 जूनकेँ लंदन जाय वला एयर इंडिया केर फ्लाइट एआई-171, जाहिमे कुल 242 यात्री आ चालक दलक सदस्य छल, अहमदाबाद केर मेडिकल कॉलेज परिसरमे खसि पड़ल। एहि दुर्घटनामे एक व्यक्तिकेँ छोड़ि विमानमे सवार सभ यात्रीक मृत्यु भऽ गेल आ अन्य 29 गोटेक मौत सेहो भेल।
