मंगलदिन बिहारक राजनीतिमे फेरसँ एकटा पैघ खेल भेल, जखन महागठबंधनक तीनटा विधायक भाजपाक संग आबि गेलाह। मंगल दिन भाजपा प्रदेश अध्यक्ष सम्राट चौधरीक संग कांग्रेस विधायक मुरारी गौतम आ सिद्धार्थ सौरव ,एवं राजदक संगीता देवी विधानसभा पहुंचलीह।
एकर बाद ई स्पष्ट भऽ गेल जे महागठबंधनक तीनटा विधायक एनडीएमे शामिल भेल। राजदक संगीता कुमारी कैमूर जिलाक मोहनियासँ विधायक छथि, जखन कि सिद्धार्थ सौरव विक्रम सीटसँ आ मुरारी गौतम चेनारी सीटसँ विधायक छथि।
भाजपा प्रवक्ता कुंतल कृष्ण कहलनि जे प्रधानमंत्री नरेन्द्र मोदीक राष्ट्रवाद नीति आ भाजपाक बढ़ैत समर्थन आधारकेँ देखैत महागठबंधनक तीनटा विधायक भगवामे शामिल भऽ गेल छथि।
ओ आगू कहलनि जे एक दिस राष्ट्रवाद अछि आ दोसर दिस परिवारवाद अछि, राष्ट्रवाद पसन्द करयवला विधायक एक संग आबि रहल छथि।
एहिसँ पहिने राजदक तीनटा विधायक पाला बदलि भाजपामे शामिल भऽ गेल छलाह। मुदा, विधानसभा सचिवालय द्वारा एखन धरि कोनो आधिकारिक अधिसूचना जारी नहिं कयल गेल अछि। एहन स्थितिमे आधिकारिक रूपसँ विधायकक संख्यामे कोनो अंतर नहिं होएत।
राजद विधायक रामानुज प्रसाद कहलनि जे “हमर विधायक टूटैत नहिं अछि, तोड़ल जा रहल अछि। मोदी जी (प्रधानमंत्री नरेन्द्र मोदी) धमकी दऽ कऽ हमर मुख्यमंत्रीकेँ तोड़ि लेलनि। मोदी देशक सरकार तोड़ि लेलनि। मोदीजी अजित पवारकेँ लए गेलाह। शिंदेकेँ लए गेलइ। ई सब पूरा देशमे भए रहल अछि। देशमे अराजकता अछि, भय अछि। चारूकात बेचैनी अछि। चारूकात तनाव अछि। मॉब लिंचिंग अछि। पैसा लिंचिंग अछि। शक्ति लिंचिंग अछि। तऽ एहिमे की कहल जा सकैछ ? घरक लोक जखनि डरि जायत तखनि ओ मरि जाएत।”
एकर बाद पत्रकार रामानुज प्रसादसँ पुछलखिन जे अहाँक नेता तेजस्वी यादव खेलाक बारेमे गप्प करैत छलाह। मुदा ई तऽ अहींक संग खेला भऽ गेल। जबाबमे रामानुज प्रसाद कहलनि जे ‘हम सभ एही खेलाक बात कऽ रहल छलहुँ। इ खेले भऽ रहल अछि। लोकतंत्रक चीरहरण भऽ रहल अछि।’
वास्तवमे जखन नीतीश कुमार महागठबंधनसँ संबंध तोड़ि भाजपासँ हाथ मिला लेलनि तखन तेजस्वी मीडियामे बयान देने छलाह जे असली खेल एखनि बाकी अछि, जाहिमे अनुमान लगाओल जा रहल छल जे ओ जेडीयू-भाजपामे सेंधमारीक गप्प कहि रहल छथि, मुदा दांव उलटा होइत बुझा रहल अछि।
कहल तऽ इहो जा रहल अछि जे कांग्रेसक एखनि आर दू टा विधायक भाजपामे शामिल होयत। संगहि राजदक सेहो किछु विधायक संपर्कमे अछि।
