एनडीएमे शामिल लोक जनशक्ति पार्टी (रामविलास) केर प्रमुख आ केंद्रीय मंत्री चिराग पासवान बिहारमे कानून व्यवस्थाक स्थिति पर फेरसॅं सवाल उठेलनि। ओ कहलनि जे, राज्यमे सिलसिलावार आपराधिक घटना घटल अछि आ प्रशासन अपराधीक सामने पूर्ण रूपसॅं नतमस्तक बुझाइत अछि।
चिराग पासवान पटनामे पत्रकारसॅं गप करैत कहलनि जे इ सही अछि जे एहि घटना पर कार्यवाही भेल अछि, मुदा सवाल अछि जे एहेन घटना किएक भऽ रहल अछि ? आब लगैत अछि जे प्रशासन एहि घटना सभकेँ रोकयमे पूर्ण रूपसॅं असमर्थ आ असफल भऽ गेल अछि। जॅं ई जारी रहत तॅं आगामी दिनमे राज्य लेल बहुत खतरनाक स्थिति पैदा करत।
ओ कहलनि जे, भले हम ई मानि ली जे ई घटना सरकारकें बदनाम करय केर साजिशक हिस्साक रूपमे भऽ रहल अछि, मुदा ओकरा पर नियंत्रण राखब प्रशासनक जिम्मेदारी अछि। एहिमे प्रशासनक सहमतिक संभावना सेहो व्यक्त कयलनि।
ओ बिहार सरकारसॅं आग्रह करैत कहलनि जे इ जरूरी अछि जे हमसब समय पर एहि पर कार्यवाही करी। ओ कहलनि जे, हमरा दुख भऽ रहल अछि जे हम एहेन सरकारक समर्थन कय रहल छी जतय अपराध पूर्ण रूपसॅं व्याप्त भऽ गेल अछि, एकरा पर नियंत्रण राखब जरूरी अछि।
मतदाता संशोधनक विरोधमे विधानसभाक नेता प्रतिपक्ष तेजस्वी यादव द्वारा चुनाव केर बहिष्कारक बारेमे केंद्रीय मंत्री चिराग पासवान कहलनि जे जँ हुनका सबमे हिम्मत अछि तॅं एक बेर चुनावक बहिष्कार कय देखाबय केर चाही। राजद एहेन राजनीतिक दल अछि जकरामे असगर चुनाव लड़बाक हिम्मत नहि अछि, बहिष्कार कोना करत ? गठबंधनमे कांग्रेस सबसॅं पुरान पार्टी अछि, ओहो असगरे चुनाव लड़ि नहि सकैत अछि। ई सब लोक बस धमकी देबय केर काज कय रहल छथि।
ओ कहलनि जे, विपक्ष केर धमकी दऽ कय वोट लेबय केर आदत भऽ गेल अछि। तहिना लोकसभामे आरक्षण आ संविधान समाप्त हेबाक आशंका पसारल। संविधान कतय समाप्त भेल? ओ कहलनि जे इ लोक मतदाता सूचीक संशोधनक संबंधमे लोककें डरा रहल अछि। जँ अहाँ लग प्रमाण अछि तखनि देखाउ। बस हंगामा मचा रहल अछि। ओ कहलनि जे, हम सब अपन देशमे कोनो घुसपैठियाकें अपन मताधिकारक प्रयोग नहि करय देब आ कोनो मतदाताक नाम हटाओल नहि जायत।
