भाजपाक वरिष्ठ नेता आ केन्द्रीय गृहमंत्री अमित शाह शनिदिन एकटा चुनावी रैलीमे कहलनि जे ई विधानसभा चुनाव जम्मू-कश्मीरमे तीन परिवारक शासन समाप्त करय जा रहल अछि। अब्दुल्ला परिवार, मुफ्ती परिवार आ नेहरू-गाँधी परिवार एतय लोकतांत्रिक शासनक मार्गमे बाधा उत्पन्न कयलक। जँ २०१४ मे मोदी सरकार सत्तामे नहिं अबैत तँ पंचायत, प्रखण्ड आ जिला चुनाव नहिं होइत । भाजपाक वरिष्ठ नेता, स्टार प्रचारक, केन्द्रीय गृह आ सहकारिता मंत्री अमित शाह विधानसभा चुनावक प्रचार करबाक लेल शनिकेँ जम्मू-कश्मीरमे छलथि।
पुंछ जिलाक मेंढरमे एकटा चुनावी जनसभाकेँ सम्बोधित करैत शाह कहलनि जे अब्दुल्ला, मुफ्ती आ नेहरू-गाँधी परिवार १९९०क दशकसँ जम्मू-कश्मीरमे आतंकवादक प्रसार कयने अछि। “१९९० केर दशकमे जम्मू-कश्मीरमे गोलीबारीक कतेक घटना भेल छल। पहिने एतय गोलीबारी होइत छल किएक तँ पहिने एहिठामक आका पाकिस्तानसँ डरैत छलाह मुदा आब पाकिस्तान प्रधानमंत्री मोदीसँ डरैत अछि।हुनका सभमे गोली चलयबाक साहस नहिं अछि आ जँ ओ गोली चलबैत छथि तँ गोलीक उत्तर गोलासँ देल जायत। आइ मोदी सरकार जम्मू-कश्मीरमे आतंकवादकेँ समाप्त कऽ देलक अछि। एहिठामक नौजवानसभकेँ पाथरक बदला लैपटॉप देल गेल अछि।”
भाजपाक वरिष्ठ नेता साह विपक्षी दल पर हमला करैत कहलनि कि कांग्रेस आ नेशनल कॉन्फ्रेंस कहलक अछि जे हम आरक्षण खतम करब जखनि कि हम कहि रहल छी जे हम गुज्जर, बकरवाल आ पहाड़ीकेँ प्रमोशनमे सेहो आरक्षण देब। प्रधानमंत्री मोदीक आगमनक बाद ओबीसी, पिछड़ा, गुज्जर, बकरवाल आ पहाड़ी सभकेँ आरक्षण भेटल। जखनि हम विधेयक पेश कयलहुँ तखनि फारूक अब्दुल्लाक पार्टी एकर विरोध कयलक आ एतय गुर्जर बंधुसभकेँ भड़काबय लागल। जखनि हम राजौरी आयल छलहुं तखन हम वादा कयने छलहुं जे हम गुर्जर बंधुक आरक्षण कम नहिं करब आ पहाड़ीक आरक्षण सेहो देब आ हम ओ वादा पूरा कयलहुँ।
