ईरानक दक्षिण-पश्चिम भागमे स्थित बंदर अब्बास शहरमे शनिकेँ दिन शहीद राजई बंदरगाह पर एकटा पैघ धमाका भेल। धमाका एतेक भीषण छल जे एहि धमाकामे अखन धरि 516 लोककेँ घायल होयबाक पुष्टि भेल अछि। धमाकामे कतेको लोकक मृत्यु होयबाक आशंका सेहो अछि, मुदा एकर अखन धरि पुष्टि नहि भेल अछि।
बंदरगाह पर धमाकाक बाद हर जगह लोकक चीख पुकार मचि गेल। सोशल मीडिया पर कतेको वीडियोमे विस्फोटक बाद काला धुआँ उठैत देखाइत अछि। एकटा वीडियोमे विस्फोट स्थलसँ कतेको किलोमीटर दूर स्थित भवनक शीशा टूटैत देखाइत अछि। ताहि ठाम, भीषण विस्फोटक बाद आग बुझएबाक लेल बंदरगाह पर सब गतिविधिकेँ तुरन्त रोकल गेल।
एहि बंदरगाह पर पैघ संख्यांमे लोक कार्य करैत अछि, एहेनमे एहि धमाकामे पैघ संख्यांमे कर्मचारी घायल होएबाक आ मारल जाएबक सम्भावना अछि।
शहीद राजई बंदरगाह ईरानक राजधानी तेहरानसँ 1,000 किलोमीटर दक्षिणमे आ बंदर अब्बास शहरसँ 23 किलोमीटर पश्चिम दिशामे स्थित अछि। ई ईरानक सभसँ बेहतर कंटेनर पोर्ट आ कंटेनर जहाज सभक लेल एकटा प्रमुख केंद्र अछि। एहि बंदरगाहसँ होइत विश्वक तेल उत्पादनक पांचम हिस्सा आगू जाएत अछि। प्रांतीय
आपदा प्रबंधन अधिकारी मेहरदाद हसनजादेह ईरानी सरकारी टीवीकेँ कहलनि जे प्रथम प्रतिक्रिया दल ओहि क्षेत्रमे पहुँचैक प्रयास कय रहल अछि, जखनि अन्य लोक सभ घटनास्थलकेँ खाली करैक प्रयास कय रहल छथि। हसनज़ादेह कहलनि जे विस्फोट राजई बंदरगाहसँ आएल कंटेनर सभसँ भेल, मुदा ओ विस्तारसँ नहि कहलनि। सरकारी टीवी कहलक जे विस्फोटक कारण एकटा इमारत ढहि गेल, हालांकि तत्क्षण कोनो अन्य विवरण नहि देल गेल।
ईरानमे औद्योगिक दुर्घटनासभ होइत रहैत अछि, खास कऽ ओकर पुरान तेल सुविधा सभमे, जे अंतरराष्ट्रीय प्रतिबंध सभक कारण संघर्ष कऽ रहल अछि। राजई बंदरगाह ईरानक राजधानी तेहरानसँ लगभग 1,050 किलोमीटर दूर होर्मुज जलडमरूमध्य पर स्थित अछि। होर्मुज फारसक खाड़ीमे एकटा संकरा मार्ग अछि, जकरा माध्यमसँ 20 प्रतिशत तेलक व्यापार होइत अछि। ई विस्फोट एहेन समयमे भेल अछि जखनि ईरानक तेजीसँ बढ़ैत परमाणु कार्यक्रम पर शनिबार ओमानमे ईरान आ अमेरिकाक बीच तेसर दौरक वार्ता भऽ रहल अछि।
