कांग्रेस सांसद राहुल गांधी सोमदिन मणिपुर दौरा पर छथि। कांग्रेस सांसद राहुल गाँधी मणिपुरक चुराचांदपुरक मंडप, तुइबोंगमे एकटा राहत शिविरमे लोकसभसँ भेंट कयलनि। राहुल लोकक समस्या सेहो सुनलनि। सोमक साँझमे मणिपुरक राज्यपालसँ भेंट कय रहल छथि।
राहत शिविरमे राहुल गाँधी सभ लोकक संग जमीन पर बैसि हुनकर बात सुनलनि। मणिपुरमे बहुत दिनसँ मैतेयी आ कुकी समुदायक बीच हिंसक झड़प भऽ रहल अछि। एहि दङ्गाक कारण पैघ संख्यामे लोक बेघर भऽ गेल अछि आ कतेको लोकक मृत्यु सेहो भेल अछि।
लोकसभामे प्रतिपक्षक नेता राहुल गाँधी मणिपुरक जिरिबाम जिलाक राहत शिविरक सेहो दौरा कयलाक बाद सोमदिन सिलचर हवाई अड्डासँ इम्फाल हवाई अड्डा पहुँचलाह। एकर बाद ओ सड़क मार्गसँ चुराचांदपुर लेल प्रस्थान कयलनि। प्रदेश कांग्रेस अध्यक्ष कीशम मेघचंद्र आ कांग्रेस विधायक दलक नेता ओ इबोबी सिंह सेहो हुनका सङ्ग एहि यात्रामे छथि। मेघचंद्र संवाददाता सभसँ कहलनि, “राहुल गाँधीक यात्राक उद्देश्य लोकसभकेँ सहायता प्रदान करब आ जमीनी स्थितिक जायजा लेनाइ अछि। हुनक यात्रा हालक हिंसासँ प्रभावित लोकक चिन्ताकेँ दूर करबाक पार्टीक प्रतिबद्धताकेँ प्रतिबिम्बित करैत अछि।”
एहिसँ पहिने राहुल गाँधी फुलेरतालमे एकटा राहत शिविरक दौरा कयलनि जतय असममे बाढ़िसँ प्रभावित लोक रहि रहल छथि। असममे लगभग २३ लाख लोक बाढ़िसँ प्रभावित अछि।
पछिला साल मईमे जातीय हिंसा भड़कलाक बाद पूर्वोत्तर राज्यक ई हुनकर तेसर यात्रा होयत आ प्रतिपक्षक नेताक रूपमे ई पहिल यात्रा होयत।
६ जूनकेँ ५९ वर्षीय किसान सोइबाम शरत कुमार सिंहक हत्याक बाद फेरसँ हिंसा भड़कि उठल।
राहुल गाँधी १४ जनवरीकेँ मणिपुरसँ अपन न्याय यात्राक शुरुआत कयलनि।
राहुल गाँधी मणिपुरमे चलि रहल हिंसाकेँ लऽ कऽ केन्द्र सरकारपर लगातार हमला कऽ रहल छथि। एहिसँ पहिने ओ संसदमे सेहो ई मुद्दा उठौने छलाह।
लोकसभा चुनावमे कांग्रेस मणिपुरमे दूटा लोकसभा सीट जीतल अछि। कांग्रेसक नेता लोकनिक आरोप अछि जे केंद्र सरकार मणिपुरक लगातार अनदेखी कऽ रहल अछि।
