अपराध 1600 बोतल प्रतिबंधित कफ सिरप आ बलेनो कार संग दु गोटे गिरफ्तार July 1, 2024 Maithil Punarjagran Prakash सहरसा समदिया * पुलिस अधीक्षक हिमांशुक निर्देश पर शून्य सहिष्णुताक तहत नशा कारोबारी आ अपराधीक खिलाफ सघन अभियान चलाओल जा रहल अछि। आ ओही श्रृंखलामे 160 लीटर प्रतिबंधित कफ सिरप आ एकटा गाड़ीक संग दू गोटेकेँ गिरफ्तार कयल गेल अछि। एहि संबंधमे रवि दिन सदर थानामे साइबर डीएसपी अजीत कुमार प्रेस वार्ता आयोजित कय उक्त जानकारी देलनि।ओ कहला जे खुफिया विभागसँ सूचना प्राप्त भेल जे बिना नंबर प्लेटक रंगीन गाड़ीमे किछु लोक कफ सिरप लऽ कऽ जा रहल अछि। सूचना पाबि सत्यापन लेल पुलिस पहुंचल तऽ देखल सड़कक कातमे नील रंगक चारि पहिया बलेनो गाड़ी त्रिमूर्ति चौक लग ठाढ़ छल। जहिना ओ सब ठाढ़ गाड़ी लग पहुँचल। पुलिसक गाड़ी देखि उक्त गाड़ीमे बैसल दुनू युवक गाड़ी रोकि भागय लागल। जकरा सशस्त्र बलक मददिसँ घेरल गेल आ ओकरा कब्जामे लेल गेल। उक्त कारक तलाशी लेल गेल तऽ ओहिमे सँ कोडीन युक्त भारी मात्रामे कफ सिरप बरामद कयल गेल। दुनू आरोपी कुल 160 लीटर कोडीन युक्त खांसीक सिरप आ नील रंगक बलेनो कारक संग गिरफ्तार कयल गेल। एहि संबंधमे सदर थाना केस नंबर-650/24 बिहार निषेध आ आबकारी कानून-2022 मे दर्ज करवा आगूक कारवाई कयल जा रहल अछि। एहि छापामारी दलमे सदर थानाध्यक्ष सुबोध कुमार, सहायक उप निरीक्षक अजय कुमार पासवान एवं रिजर्व गार्ड शामिल रहलाह। Spread the love
